எம்.எஸ். சுப்புலட்சுமி நூற்றாண்டு: சிறப்பு தபால் தலை வெளியிடுகிறது ஐ.நா.

மறைந்த கர்நாடக இசைக் கலைஞர் எம்.எஸ்.சுப்புலட்சுமியின்
பிறந்த நூற்றாண்டையொட்டி, அடுத்த வாரம் நடைபெற உள்ள
இந்தியாவின் 70-ஆவது சுதந்திர தின விழாவில் சிறப்பு தபால்
தலை வெளியிட ஐ.நா.சபை முடிவு செய்துள்ளது.

இதுகுறித்து ஐ.நா.சபைக்கான இந்தியாவின் நிரந்தரத்
தூதரகத்தின் சார்பில் வெள்ளிக்கிழமை வெளியிடப்பட்ட செய்தி
அறிக்கையில் கூறப்பட்டுள்ளதாவது:

இந்தியாவின் 70-ஆவது சுதந்திர தினம், வரும் 15-ஆம் தேதி
ஐ.நா. சபையில் கொண்டாடப்பட உள்ளது. அதையொட்டி,
ஐ.நா. சபையின் தூதர்கள், சர்வதேசத் தலைவர்கள் ஆகியோர்
முன்னிலையில் ஆஸ்கார் விருது பெற்ற இந்திய இசையமைப்பாளர்
ஏ.ஆர்.ரஹ்மான் சிறப்புக் கச்சேரி நடத்தவுள்ளார்.

ஏ.ஆர்.ரஹ்மான், ஐ.நா. சபையின் மைய மண்டபத்தில் கச்சேரி
நடத்தும் இரண்டாவது இந்தியர் ஆவார். முன்னதாக, கடந்த 1966-ஆம்
ஆண்டு அக்டோபர் மாதம் ஐ.நா.சபையின் அப்போதைய பொதுச்
செயலர் யூ.தாண்ட் விடுத்த அழைப்பின் பேரில், இந்திய அரசின்
உயரிய விருதான “பாரத ரத்னா’ பெற்ற இசைக் கலைஞர்
எம்.எஸ்.சுப்புலட்சுமி ஐ.நா. மைய மண்டபத்தில் கச்சேரி நடத்தினார்.

மேலும், எம்.எஸ்.சுப்புலட்சுமியின் பிறந்த நூற்றாண்டு அடுத்த மாதம்
16-ஆம் தேதி கொண்டாடப்படுவதை முன்னிட்டும், ஐ.நா.சபையில்
அவர் கச்சேரி நடத்தி 50 ஆண்டுகள் நிறைவடைவதை முன்னிட்டும்
வரும் 15-ஆம் தேதி முதல் 19-ஆம் தேதி வரை அவரது நினைவைப்
போற்றும் புகைப்படக் கண்காட்சி நடத்தப்படும்.

மேலும், வரும் 15-ஆம் தேதி ஐ.நா.வுக்கான இந்தியத் தூதரகத்தில்
இந்தியக் கொடி ஏற்றப்படும். இந்த நிகழ்ச்சிகளை, இந்தியத்
தூதரகமும், இந்தியாவின் பிரபல தொண்டு நிறுவனமான சங்கர
நேத்ராலயாவும் இணைந்து ஏற்பாடு செய்கின்றன.

இந்த ஆண்டில், ஐ.நா.சபையின் 70-ஆவது ஆண்டு விழாவும்
கொண்டாடப்பட உள்ளது. எனவே, தற்காலத்திய சர்வதேச
சிந்தனைகளோடு இந்தியப் பாரம்பரியம் எவ்வாறு ஒத்துப்
போகின்றன என்பதை இந்த நிகழ்ச்சிகள் வலியுறுத்தும் என்று
அந்த அறிக்கையில் கூறப்பட்டுள்ளது.
–
———————————
தினமணி