அடுத்த தசராவுக்குள் அமராவதி 'ரெடி': சந்திரபாபு நாயுடு உறுதி

விஜயவாடா:
'அடுத்த தசரா பண்டிகைக்குள், உலகத்தரம் வாய்ந்த
தலைநகரமாக, அமராவதி தயாராகி விடும்' என,
ஆந்திர முதல்வர் சந்திரபாபு நாயுடு தெரிவித்தார்.

புதிய தலைநகர் :

ஒருங்கிணைந்த ஆந்திர பிரதேச மாநிலம், ஆந்திரா,
தெலுங்கானா என, இரு மாநிலமாக பிரிக்கப்பட்டது.
ஆந்திர பிரதேசத்தின் தலைநகரமாக இருந்த ஐதராபாத்,
தெலுங்கானா மாநிலத்தின் தலைநகரமாக மாறியது.

இதையடுத்து, ஆந்திராவுக்கான புதிய தலைநகரை
தேர்வு செய்ய வேண்டிய அவசியம் ஏற்பட்டது. விஜயவாடா
அருகேயுள்ள அமராவதியை தலைநகரமாக மாற்ற,
சந்திரபாபு நாயுடு தலைமையிலான தெலுங்கு தேச அரசு
முடிவு செய்தது;
இதற்கான பணிகள் தீவிரமாக நடந்து வருகின்றன.

அடுத்த தசராவுக்குள்..

இந்த நிலையில், விஜயதசமியை முன்னிட்டு, மக்களுக்கு
வாழ்த்து தெரிவித்து, முதல்வர் சந்திரபாபு நாயுடு வெளியிட்டுள்ள
அறிக்கையில் கூறியிருப்பதாவது: அமராவதியை, உலகத்தரம்
வாய்ந்த தலைநகரமாக்க பணிகள் நடந்து வருகின்றன. அடுத்த
தசராவுக்குள் பணிகள் நிறைவு பெற்று, உலகத்தரம் வாய்ந்த
தலைநகரமாக அமராவதி தயாராகி விடும்.

இளைஞர்களுக்கு, அதிக வேலைவாய்ப்பை ஏற்படுத்தி தரும்
நகரமாக, அமராவதி இருக்கும்.

விவசாயிகளுக்கு நன்றி:

மாநில பிரிவினையால் பாதிக்கப்பட்ட ஆந்திரா, அதிலிருந்து
மீண்டு, இப்போது வளர்ச்சிப் பாதையில் நடைபோடத்
துவங்கியுள்ளது. அதனால், உலகத்தரம் வாய்ந்த ஐந்து
நகரங்களில் ஒன்றாக, அமராவதி இருக்கும் என நம்புகிறேன்.
சிறந்த தலைநகரை உருவாக்க, நிலம் கொடுத்த விவசாயிகளுக்கு
நன்றி தெரிவித்து கொள்கிறேன்.

அவர்களின் தியாகத்தை, அரசு ஒரு போதும் மறக்காது.
அமராவதியில் பள்ளிகள் அமைக்க, சர்வதேச அளவில் சிறந்த,
13 பள்ளிகள் முன் வந்துள்ளன. அதனால், அமராவதி, கல்வி
மையமாகவும் திகழும். இவ்வாறு கூறியுள்ளார்.
-
---------------------------
தினமலர்