ம.பி.யில் ரேஷன் கடைக்குள் புகுந்து உணவு தானியங்கள் கொள்ளை

ரூ.500, 1000 நடவடிக்கைக்குப் பிறகு நாடு முழுவதும்
பணத் தட்டுப்பாடு நிலவுவதால் அத்தியாவசியப்
பொருட்களை வாங்குவதற்கு கையில் காசு இல்லாத
மக்கள் ரேஷன் கடைக்குள் புகுந்து உணவு தானியங்களை
கொள்ளையடித்துச் சென்ற சம்பவம் மத்தியப் பிரதேச
மாநிலம் சத்தர்பூர் மாவட்டத்தில் நிகழ்ந்துள்ளது.

ஆனால் இந்த தகவலை போலீஸார் மறுத்துள்ளனர்.
சிறிய பிரச்சினை காரணமாகவே இந்த சம்பவம்
நிகழ்ந்ததாகவும், பணத் தட்டுப்பாடு காரணமல்ல என்றும்
போலீஸார் தெரிவிக்கின்றனர்.

பர்தாஹா கிராம பஞ்சாயத்தார் கூறும்போது,
‘‘ரேஷன் கடையை நிர்வகித்து வரும் லால் அஹிர்வார்
கடந்த 4 மாதங்களுக்கு மேலாக குடும்ப அட்டைதாரர்களுக்கு
உரிய உணவு தானியங்களை வழங்கவில்லை.

கிராம மக்களும் முதல்வரின் உதவி எண்ணிலும், உள்ளூர்
போலீஸாரிடமும் புகார் அளித்து பார்த்தனர்.

ஆனால் எந்த நடவடிக்கையும் எடுக்கப்படவில்லை.
வழக்கம்போல நேற்று ரேஷன் கடைக்கு வந்த பொதுமக்களிடம்
ஒரு மாதத்துக்கான உணவுப் பொருட்களை மட்டும் பெற்றுக்
கொள்ளும்படி லால் அறிவுறுத்தினார்.

இதனால் ஆவேசமடைந்த மக்கள் 4 மாதத்துக்கான தானியங்களை
வழங்கும்படி கேட்டு போராட்டத்தில் ஈடுபட்டனர்.
யாரும் உணவுப் பொருட்களை கொள்ளையடித்துச் செல்லவில்லை’’
என்றனர்.

துணை எஸ்ஐ ராம் கிஷோர் திவாரியும் இந்த தகவலை
உறுதி செய்துள்ளார். பல மாதங்களாக உரிய உணவுப்
பொருட்களை வழங்காத காரணத்தினால் தான் அந்த ரேஷன்
கடையில் பிரச்சினை வெடித்ததாக தெரிவித்தார்.

அதேசமயம், அந்த ரேஷன் கடைக்குள் அத்துமீறி நுழைந்து
அரிசி, பருப்பு உள்ளிட்ட தானியங்களை பொதுமக்கள்
அள்ளிச் சென்ற வீடியோ காட்சிகளும் வெளியாகியுள்ளன.
இது தொடர்பாக போலீஸார் விசாரணை நடத்தி வருகின்றனர்.
-
----------------------------