ஹவாலா மோசடியாளர்கள் பின்பற்றிய புதிய யுக்தி: வருமான வரித்துறை கண்டுபிடிப்பு

புது தில்லி: நாடு முழுவதும் வருமான வரித்துறையினர் நடத்தி வரும் அதிரடி சோதனையில் பெங்களூர், பஞ்ஜிம், பரிதாபாத் பகுதிகளில் கோடிக் கணக்கான பணம் பறிமுதல் செய்யப்பட்டுள்ளது.

பெங்களூரில் ரூ.2.25 கோடி அளவுக்கு வருமான வரித்துறையினரின் அதிரடி சோதனையில் கைப்பற்றப்பட்டதாகவும், இவை அனைத்தும் புதிய ரூபாய் நோட்டுகள் என்றும் தெரிவிக்கப்பட்டுள்ளது.

இதே போல, பஞ்ஜிம் பகுதியில் ரூ.68 லட்சம் மதிப்புள்ள ரூபாய் நோட்டுகள் பறிமுதல் செய்யப்பட்டுள்ளது.

பரிதாபாத்தில் 2000 ரூபாய் நோட்டுக் கட்டுகளாக ரூ.25 லட்சம் அளவுக்கு பறிமுதல் செய்யப்பட்டுள்ளது.

தில்லியின் கரோல் பாக்கில் உள்ள உணவு விடுதியில் நடந்த சோதனையில் ரூ.3.25 கோடி அளவுக்கு பணம் கைப்பற்றப்பட்டது.

இந்த நிலையில், பண மோடிசயில் ஈடுபடும் ஹவாலா மோசடிக்காரர்கள், பணத்தை விமான ஸ்கேனர் இயந்திரங்கள் கூட கண்டுபிடிக்க முடியாத அளவுக்கு பேக்கிங் செய்யும் புதிய யுக்தியை பின்பற்றி வந்தது விசாரணையில் கண்டுபிடிக்கப்பட்டுள்ளது.

ஒரு குறிப்பிட்ட வகை டேப் மற்றும் வொயர்களை பயன்படுத்தி பணத்தை பார்சல் செய்யும் போது, அது எக்ஸ்-ரே மற்றும் ஸ்கேனர்களில் சிக்குவதில்லை.
இந்த விசாரணையின் அடிப்படையில் வருமான வரித்துறையினர் ஏராளமான பணத்தையும், ஹவாலா மோசடியாளர்கள் பயன்படுத்திய செல்போனையும் கைப்பற்றியுள்ளனர்.

இந்த செல்போனில் ஹவாலா மோசடிக் கும்பலைச் சேர்ந்த பலரின் செல்போன் எண்களும் வருமான வரித்துறைக்கு கிடைத்துள்ளது.

தினமணி