ரூ. 1 கோடி டிபாசிட்? கூலி தொழிலாளிக்கு வருமான வரித்துறை நோட்டீஸ்

by rammalar Tue Dec 20, 2016 10:19 pm

போபால்:
வங்கியில் ரூ.1 கோடி செலுத்தியதாக கூலி தொழிலாளி
ஒருவருக்கு வருமான வரித்துறை அதிகாரிகள் நோட்டீஸ்
அனுப்பியுள்ளனர்.

இதனை தொடர்ந்து, வங்கி ஊழியர் தவறே அதிக பணம்
டிபாசிட் ஆக மாறியதாக வங்கி விளக்கம் அளித்துள்ளது.

அதிர்ச்சி:

மத்திய பிரதேச மாநிலம் ஹோஷங்காபாத் மாவட்டத்தை
சேர்ந்தவர் அசாராம் விஸ்வகர்மா. கூலி தொழிலாளி.
கடந்த சில நாட்களுக்கு முன்னர், வருமான வரித்துறை
அதிகாரிகள், கடந்த நவம்பர் 30ம்தேதி இவருக்கு நோட்டீஸ்
அனுப்பியுள்ளனர்.

அந்த நோட்டீசில், " பான் எண் இல்லாமல் ரூ.1 கோடியே
பத்து ஆயிரம் டிபாசிட் செய்யப்பட்டுள்ளது. இது குறித்து
விளக்கம் அளிக்க வேண்டும்" எனக்கூறியிருந்தனர்.

இந்த நோட்டீஸ் ஆங்கிலத்தில் இருந்ததால் விஸ்வகர்மாவுக்கு
எதுவும் விளங்கவில்லை. அவர் அருகில் வசித்த ஆசிரியர்
ஒருவர் விளக்கமளித்த பிறகே, இது வருமான வரித்துறை
நோட்டீஸ் என தெரியவந்துள்ளது. இதனால், அதிர்ச்சியடைந்த
விஸ்வகர்மா, உடனடியாக, தான் கணக்கு வைத்துள்ள பாங்க்
ஆப் இந்தியா கிளைக்கு சென்று விசாரித்துள்ளார்.

ஊழியர் தவறு:

இது தொடர்பாக வங்கி மேலாளர் கூறியதாவது:
விஸ்வகர்மா, வங்கியில் ரூ.10 ஆயிரம் தான் டிபாசிட் செய்துள்ளார்.
ஆனால், ஊழியர் தவறுதலாக, ரூ.1 கோடியே 10 ஆயிரம் டிபாசிட்
செய்ததாக கணக்கு எழுதியுள்ளார். விஸ்வகர்மா, 20 பழைய
ரூ.500 நோட்டுகள் டிபாசிட் செய்துள்ளார். ஆனால் ஊழியர்,
தவறுதலாக 20,000 பழைய ரூ.500 நோட்டை டிபாசிட் செய்ததாக
கணக்கிட்டுள்ளார். விஸ்வகர்மா எங்களை அணுகிய பிறகு இந்த
தவறு கண்டுபிடிக்கப் பட்டுள்ளது.

இது தொடர்பாக வருமான வரித்துறை அதிகாரிகளுக்கு தகவல்
தெரிவிக்கப் பட்டுள்ளது என்றார்.
இது குறித்து வருமான வரித்துறை அதிகாரிகள் எதுவும் கூறவில்லை.

நோட்டீஸ்:

மத்திய பிரதேசம் மற்றும் சத்தீஸ்கரில் சந்தேகமான வகையில்
பணப்பரிமாற்றம் செய்ததாக 1000க்கும் மேற்பட்டவர்களுக்கு
வருமான வரித்துறை அதிகாரிகள் நோட்டீஸ் அனுப்பியுள்ளனர்.
-
-------------------------------
தினமலர்