ரூ.113 கோடியில் மூக்கையூர் மீன்பிடித் துறைமுகம்: தமிழக அரசு

by rammalar Sun Jan 01, 2017 9:51 am

-
ராமநாதபுரம் மாவட்டம் மூக்கையூர் மீன்பிடித் துறைமுகத்தை ரூ.113.90 கோடியில் அமைக்க மத்திய அரசு நிர்வாக ஒப்புதல் வழங்கியுள்ளது என்று தமிழக அரசு தெரிவித்துள்ளது.
-
பாக் ஜலசந்தி பகுதியில் மீனவர்கள் சந்திக்கும் பிரச்னைகளைத் தீர்க்கும் வகையில் மீனவர்கள் ஆழ்கடல் மீன்பிடிப்பை ஊக்குவிக்க தமிழக அரசு நடவடிக்கை எடுத்து வருகிறது. இதற்கான உள்கட்டமைப்பு வசதிகளை உருவாக்க பிரதமர் நரேந்திர மோடியிடம் முதல்வர் ஓ.பன்னீர்செல்வம் கோரிக்கை விடுத்து, ரூ.1,520 கோடி சிறப்பு நிதியுதவியையும் கோரினார்.
-
இந்த நிலையில், உள்கட்டமைப்பு வசதிகளின் ஒரு பகுதியாக ராமநாதபுரம் மாவட்டம் மூக்கையூரில் மீ
ன்பிடித் துறைமுகத்தை ரூ.113.90 கோடிக்கு அமைப்பதற்கான நிர்வாக ஒப்புதலை மத்திய அரசு வழங்கியுள்ளது.
-
இதனால், ராமேசுவரம் பகுதியில் பாக் ஜலசந்தியில் மீன்பிடி விசைப் படகுகளின் நெரிசல் குறைக்கப்படுவதுடன், மூக்கையூர், அதன் அருகிலுள்ள கிராமங்களைச் சேர்ந்த ஆயிரக்கணக்கான மீனவர்கள் தங்களது மீன்பிடிப் படகுகளை பாதுகாப்பாக நிறுத்தி, மீன்பிடித் தொழிலை மேற்கொள்ள முடியும்.
-
துறைமுகத்தில் வசதிகள்: மத்திய அரசின் 50 சதவீத நிதியுதவியுடன் கட்டப்பட உள்ள இந்த மீன்பிடித் துறைமுகத்தில் அலைத்தடுப்பு சுவர், படகு அணையும் தளம், தடுப்புச்சுவர், ஏலக்கூடம், மீன் உலர்தளம், வலைப்பின்னும் கூடம், குளிர்பதன நிலையம், எரிபொருள் நிலையம், படகு பழுதுப் பார்க்கும் வசதிகள், மீனவர் ஓய்வு அறை, நிர்வாக கட்டடம் உள்ளிட்ட அனைத்து வசதிகளுடன் உலகத்தரத்துடன் உருவாக்கப்படும்.
-
இதற்குத் தேவையான மீதமுள்ள 50 சதவீதத் தொகையான ரூ.56.95 கோடியை தமிழக அரசு தனது சொந்த நிதியை முதலீடு செய்ய உள்ளது.
-
மீனவர்களுக்கும் பயன்: ஒப்பந்தப் புள்ளிகள் கோரப்பட்டு துறைமுகத்துக்கான பணிகள் விரைவில் தொடங்கப்பட உள்ளன. இந்த மீன்பிடி துறைமுகம் மூலம் ராமேசுவரம், பாம்பன், மண்டபம், மூக்கையூர், அதனைச் சுற்றியுள்ள மீனவ கிராமங்களைச் சேர்ந்த 250 விசைப் படகுகளையும், 200 நாட்டுப் படகுகளையும் மீனவர்கள் பாதுகாப்பாக நிறுத்தி மீன்பிடி தொழிலில் ஈடுபட முடியும்.
-
மீனவர்கள் தாங்கள் பிடிக்கும் மீன்களை சுகாதாரமாக கையாள்வதன் மூலம் அவற்றுக்கு ஏற்றுமதி சந்தையில் அதிக விலையைப் பெற்று வாழ்வில் ஏற்றமடைவர் என தமிழக அரசு வெள்ளிக்கிழமை வெளியிட்டுள்ள செய்திக்குறிப்பில் தெரிவிக்கப்பட்டுள்ளது.
-
தினமணி