ஜல்லிக்கட்டுக்கு ஆதரவாக தமிழகம் முழுவதும் தீவிரமடையும் மாணவர்கள் போராட்டம்

மதுரை:
ஜல்லிக்கட்டு நடத்த நடவடிக்கை எடுக்க கோரி மதுரை ஆட்சியர் அலுவலகம் முன் மாணவர்கள் தொடர் தர்ணா போராட்டத்தில் ஈடுபட்டுள்ளனர். ஜல்லிக்கட்டு நடத்த அனுமதிக்க கோரி ஆட்சியர் அலுவலகம் முன் மாணவர்கள் போராட்டத்தில் ஈடுபட்டுள்ள்ளனர். மாவட்ட ஆட்சியர்கள் தங்களை சந்தித்து கோரிக்கைகளை கேட்க வேண்டும் என மாணவர்கள் வலியுறுத்தி வருகின்றனர்.

மதுரையில் கடையடைப்பு போராட்டம்


ஜல்லிக்கட்டு நடத்துவதற்கு இருக்கும் தடையை நீக்கி, ஜல்லிக்கட்டு நடத்த அனுமதி அளிக்கும்படி வலியுறுத்தி மதுரை மாவட்டம் மேலூரை அடுத்த வெள்ளலூர் பகுதியில் கடையடைப்பு போராட்டம் நடந்து வருகிறது. வெள்ளலூரை சுற்றி உள்ள 60 கிராமங்களிலும் கடைகள் அடைக்கப்பட்டுள்ளன. ஜல்லிக்கட்டுக்கு ஆதரவாக வணிகர்களும், பொதுமக்களும் போராட்டத்தில் ஈடுபட்டுள்ளனர்.


புதுக்கோட்டை அரசு மன்னர் கல்லூரி மாணவர்கள் பேரணி


ஜல்லிக்கட்டு மீதான தடையை நீக்க வலியுறுத்தி கல்லூரி மாணவர்கள் போராட்டத்தில் ஈடுபட்டுள்ளனர். ஜல்லிக்கட்டு கோரி புதுக்கோட்டை அரசு மன்னர் கல்லூரி மாணவர்கள் 2வது நாளாக போராட்டத்தில் ஈடுபட்டுள்ளனர். கல்லூரி முன் 300க்கும் மேற்பட்ட மாணவர்கள் தொடர்ந்து போராட்டத்தில் ஈடுபட்டுள்ளனர். வாடிப்பட்டி அருகே தனிச்சியம் பிரிவில் கல்லூரி மாணவர்கள் சாலை மறியலில் ஈடுபட்டுள்ளதால் போக்குவரத்து பாதிக்கப்பட்டுள்ளது.


சென்னை சட்டக் கல்லூரி மாணவர்கள் போராட்டம்


சென்னை தரமணியில் சட்டக் கல்லூரி மாணவர்கள் ஜல்லிக்கட்டு நடத்த அனுமதி கோரி மனித சங்கிலி போராட்டம் நடத்தி வருகினறார். மேலும் புதுச்சேரியில் அரசு கலைக் கல்லூரி மாணவர்கள் வகுப்பை புறக்கணித்து போராட்டத்தில் ஈடுபட்டுவருகின்றனர். அதேபோல் அண்ணா பல்கலைக்கழகத்திலும் கல்லூரி மாணவர்கள் போராட்டத்தில் ஈடுபட்டுள்ளனர்.
-

தினகரன்