பீம்' பதிவிறக்கம் புதிய உலக சாதனை

புதுடில்லி : 'டிஜிட்டல்' பணப் பரிவர்த்தனையை ஊக்குவிக்கும் வகையில், மத்திய அரசின் சார்பில் உருவாக்கப்பட்டுள்ள, 'பீம்' செயலி, 1.7 கோடி முறை பதிவிறக்கம் செய்யப்பட்டு உள்ளது. இதன் மூலம் புதிய உலக சாதனை படைக்கப்பட்டுஉள்ளது.

கறுப்பு பண பதுக்கல் மற்றும் கள்ள நோட்டு புழக்கத்தை ஒழிக்கும் வகையில், பழைய, 500 - 1,000 ரூபாய் நோட்டுகள், கடந்த ஆண்டு நவ., 8ல் செல்லாதவையாக அறிவிக்கப்பட்டன. பிரதமர் மோடியின் இந்த அறிவிப்புக்கு, எதிர்க்கட்சிகள் கண்டனம் தெரிவித்தன.

இதையடுத்து, நாடு முழுவதும், டிஜிட்டல் பணப் பரிவர்த்தனையை ஊக்குவிக்கும் வகையில், மத்திய அரசின் சார்பில், பீம் செயலி அறிமுகம் செய்யப்பட்டது. மொபைல் போன்களில், இந்த செயலியை பதிவிறக்கம் செய்வதின் மூலம், பணமில்லா பரிவர்த்தனையை மேற்கொள்ள முடியும்.

இதுகுறித்து, பொதுமக்கள் மத்தியில் விழிப்புணர்வு பிரசாரம் மேற்கொள்ளப்பட்டது. இதன் விளைவாக, பீம் செயலி, இதுவரை, 1.7 கோடி முறை பதிவிறக்கம் செய்யப்பட்டுள்ளதாகவும்; இதன் மூலம் புதிய உலக சாதனை படைக்கப்பட்டுள்ளதாகவும், 'நிடி ஆயோக்' தெரிவித்துள்ளது.
-
தினமலர்