திருச்சியில் டாஸ்மாக் அதிகாரிகளை மாட்டுச் சாணம், துடைப்பம் கொண்டு வரவேற்ற பெண்கள்...!

-
திருச்சியில் நெடுஞ்சாலைகளில் அகற்றப்பட்ட கடைகளை
ஊருக்குள் திறக்க முயற்சி செய்த அதிகாரிகளை பெண்கள்
துடைப்பத்தைக் கொண்டு விரட்டி அடித்த சம்பவம் பரபரப்பை
ஏற்படுத்தியுள்ளது.
-
திருச்சி பால்பண்ணையை அடுத்த பொன்மலை மலையடிவாரம்
பகுதியில் புதிதாக திறக்கப்பட இருந்த டாஸ்மாக் கடையை
பார்வையிட அதிகாரிகள் வருவதாக இருந்தது.

இதுகுறித்து தகவல் அறிந்த அந்த பகுதியைச் சேர்ந்த
30-க்கும் மேற்பட்ட பெண்கள், கம்யூனிஸ்ட் மற்றும் இந்திய
ஜனநாயக வாலிபர் சங்கம் உள்ளிட்ட கட்சிகளைச் சேர்ந்த
தொண்டர்கள் எனப் பலரும் அங்கு குவிந்தனர்.

மாட்டுச்சாணியை வாளியில் கரைத்து எடுத்துக்கொண்டும்,
கையில் துடைப்பத்தோடும் ஆவேசமாக வந்த பெண்களைப்
பார்த்த அதிகாரிகள் திரும்பிச் சென்றனர்.

அதனையடுத்து போராட்டத்தில் ஈடுபட்டவர்கள் டாஸ்மாக்
கடை அமைய இருந்த கட்டடத்தை இழுத்துப் பூட்டியும் அந்த
இடத்தைத் திறக்காதபடி முள்ளை வெட்டிப் போட்டனர்.

மேலும் அவர்கள், 'எங்கள் பகுதியில் டாஸ்மாக் கடைகள்
திறக்க அனுமதிக்க மாட்டோம். மீறித் திறந்தால் கடையை
அடித்து நொறுக்குவோம்' என்றும் தெரிவித்தனர்.
-
----------------------------------
-விகடன்