கருவிழிக்குள் வாழும் கனவு

கருவிழிக்குள் காணும் கனவு
-
என்னை மறந்திருந்தேன் -தினம்
ஏங்கித் தவித்திருந்தேன்
உன்னை நினைக்காமல் - மனம்
உறங்கிக் கிடப்பதுண்டோ?
-
என்ன பிறப்பென்று - நான்
ஏங்கித் தவித்த பின்பு
நின்னைச் சரண்டைந்தேன் - உன்
நினைவில் சுகமடைந்தேன்
-
கண்ணில் ஒளியிருந்தும் -நான்
கண்ட பொருளிலெல்லாம்
நின்னையே கண்டிருந்தேன் - மன
நிம்மதி கொண்டிருந்தேன்
-
பாவி உடலெடுத்தேன்- பல
பாடுகள் பட்டுவிட்டேன்
ஆவி முடியுமுன்பே -என்
அருகில் இருப்பாயோ?
-
காணும் திசையெல்லாம் - நின்னைக்
கண்டு மகிழ்ந்திருந்தேன்
பூணும் துயர்களிலும் - நின்றன்
புன்னகை போதுமென்றேன்
-
வேறோர் திசை நடந்தால் - நான்
வேதனைக் காடடைந்தேன்
யாரோ...இவர் யாரோ - நான்
யாரை நினைத்திருப்பேன்?
-
புன்னகைப் பூக்களிலே - நெஞ்சைப்
புதைகுழி ஆக்கி விட்டாய்,
பின்னும் தனிமையிலே - என்னைப்
பித்தனாய் மாற்றிவிட்டாய்!
-
பாதைகள் வேறுபட்டும் - நெஞ்சில்
பாரம் மறைவதுண்டோ?
வாதைகள் வந்தாலும் - காதல்
வாழ்வை மறப்பதுண்டோ?
-
நின்றன் பெயர் சொல்லி - நான்
நிம்மதி காணுகிறேன்
கண்ணில் கருவிழிக்குள் - நம்
கனவுகள் பேணுகிறேன்
-
-------------------------
சென்னிமலை தண்டபாணி