கேரளாவை கலக்கிய 38 அடி நீள லிமோசின் கார்

by rammalar Thu Oct 05, 2017 7:03 pm

-
கொச்சி:
வாகன பதிவுக்காக வந்த, 38 அடி நீள லிமோசின் ரக கார்
கேரளாவில் பெரும் பரபரப்பை ஏற்படுத்தியுள்ளது.
–
கப்பலில் கொண்டு வரப்பட்ட கார்
–
லிமோசின் ரக கார்கள், கூடுதல் சொகுசு வசதி மற்றும் அதிக
இடவசதிக்கு பெயர் போனது. ஒரே நேரத்தில், 18 பேர் பயணம்
செய்ய முடியும். டிரைவருக்கு தனி கேபின், கம்ப்யூட்டர் வசதி,
‘டிவி’, மியூசிக் சிஸ்டம், மினி பார், வாஷ் பேஸின் உள்ளிட்ட
பல வசதிகள் இந்த காரில் இடம் பெற்று இருக்கும்.

கேரளாவின் ஆலப்புழா மாவட்டத்தில் உள்ள செங்கானூர்
பகுதியை சேர்ந்தவர் பாபு ஜான். இவர் துபாயில் தொழிலதிபராக
உள்ளார். சினிமேக்ஸ் மல்டிபிளக்ஸ் தியேட்டர் வைத்துள்ளார்.

இவரும், பஞ்சாபை சேர்ந்த குருதேவ் சிங் சேர்ந்து,
எட்டு கோடி ரூபாய் விலை உள்ள லிமோசின் காரை வாங்கி
உள்ளனர். துபாயில் பயன்படுத்தப்பட்ட இந்த கார், ஆறு
மாதங்களுக்கு முன் கப்பல் மூலம், கொச்சிக்கு கொண்டு
வரப்பட்டது. ஆனால், சட்டப் பிரச்னை காரணமாக,
அமெரிக்காவில் தயாரிக்கப்பட்ட இந்த காரை இறக்குமதி செய்ய
சுங்கத்துறை அதிகாரிகள் மறுத்து விட்டனர்.

நீதிமன்றம் கூட அனுமதி தரவில்லை. இறுதியாக, பெங்களூருவில்
உள்ள சுங்கம், கலால் மற்றும் சேவை வரி மேல்முறையீடு
தீர்ப்பாயத்தில் மனு தாக்கல் செய்து கார் இறக்குமதிக்கு அனுமதி
பெற்றனர்.

செல்பி எடுக்க ஆர்வம்
–
இந்த காரை பதிவு செய்ய கொச்சியில், காக்கநாடு என்ற
இடத்தில் உள்ள கலெக்டர் அலுவலக வளாகத்திற்கு, 38 நீள காரை
கொண்டு வந்தனர். ஆனால், கலெக்டர் அலுவலக வளாகத்திற்குள்
கார் நுழைய முடியவில்லை. எனவே, கொச்சி துறைமுகம் – விமான
நிலையில் சாலையில், அந்த கார் நிறுத்தப்பட்டு, எர்ணாகுளம்
ஆர்.டி.ஓ., ரிஜி வர்கீஸ், பதிவு நடவடிக்கைகளை மேற்கொண்டார்.

இந்த கார் சினிமா படப்பிடிப்பிற்காக கேரளா கொண்டு
வரப்பட்டுள்ளது. கொச்சி நகரில் இந்த காரை பார்த்த மக்கள்
முண்டியடித்து அருகில் சென்றனர். காருடன் செல்பி எடுத்து
கொள்வதில் மிகுந்த ஆர்வம் காட்டினர்.
–
—————————–
தினமலர்