இலவச, 'செட் - டாப் பாக்ஸ்' ரூ.1,200க்கு விற்பனை

by rammalar Sun Oct 08, 2017 8:38 am

தமிழக அரசு, இலவசமாக வழங்குவதாக அறிவித்த, 'செட் - டாப்
பாக்ஸ்'களை, சில ஆப்பரேட்டர்கள், 500 - 1,200 ரூபாய் வரை
விற்பதாக, வாடிக்கையாளர்கள் புகார் தெரிவித்தனர்.

'தமிழகத்தில், 'டிஜிட்டல்' தொழில்நுட்பத்தில் கேபிள், 'டிவி'
ஒளிபரப்புக்காக, 'செட் - டாப் பாக்ஸ்' இலவசமாக வழங்கப்படும்'
என, சட்டசபை தேர்தல் அறிக்கையில், ஜெயலலிதா
தெரிவித்திருந்தார்.

தற்போது, அதற்கான உரிமம் கிடைத்து விட்டதால், செட் - டாப்
பாக்ஸ் வினியோகத்தை, அரசு கேபிள், 'டிவி' நிறுவனம்
துவங்கியுள்ளது. பொது மக்களிடம் இருந்து, ஒரு பாக்சுக்கு,
175 ரூபாய் வசூல் செய்ய, ஆப்பரேட்டர்களுக்கு உத்தரவிடப்பட்டு
உள்ளது.

ஆனால், செட் - டாப் பாக்ஸ்களை, ஆப்பரேட்டர்கள், அதிக
தொகைக்கு விற்பதாக, புகார் கூறப்படுகிறது.

சென்னை, மடிப்பாக்கத்தைச் சேர்ந்த ஒரு வாடிக்கையாளர்
கூறும்போது, 'எங்கள் ஆப்பரேட்டர், 1,200 ரூபாய் கேட்கிறார்;
என்ன செய்வதென்றே தெரியவில்லை' என்றார்.

இதேபோல், காஞ்சிபுரம் மாவட்டத்திலும், 500 - 800 ரூபாய் வரை
வசூலிப்பதாக புகார் எழுந்துள்ளது.ஆனால், அரசு கேபிள் நிறுவன
அதிகாரிகள், 'பொதுமக்கள், 175 ரூபாய்க்கு மேல் பணம்
செலுத்த தேவையில்லை' என, தெரிவித்தனர்.
-
--------------------------------
- நமது நிருபர் -தினமலர்