சீன வீரர்களுடன் ராணுவ மந்திரி நிர்மலா சீதாராமன்

-
புதுடெல்லி,
இந்தியாவின் சிக்கிம் மாநிலத்தையும், சீனாவின் தன்னாட்சி பெற்ற திபெத்தையும் இணைக்கிற பகுதி, நாதுலா. இது கடல் மட்டத்தில் இருந்து 4 ஆயிரத்து 310 மீட்டர் உயரத்தில் அமைந்துள்ளது.


அங்கு ராணுவ மந்திரி நிர்மலா சீதாராமன் சென்று பார்வையிட்டார். அப்போது அவர் அசல் எல்லைக்கோட்டு பகுதிக்கு சென்றார்.


அவர், அங்கே பணியமர்த்தப்பட்டிருந்த சீன வீரர்களுடன் வெகு இயல்பாக கலந்துரையாடினார். அவர்கள் புகைப்படங்களையும் எடுத்துக்கொண்டனர்.


இது தொடர்பாக ராணுவ அமைச்சகம் டுவிட்டரில் ஒரு சிறிய வீடியோ பதிவையும் வெளியிட்டுள்ளது.


அந்தப் பதிவில் நிர்மலா சீதாராமன், சீன ராணுவ உயர் அதிகாரி ஒருவரிடம் பேசியதையும், அந்த அதிகாரி தனது சக வீரர்களை அவருக்கு அறிமுகம் செய்ததையும், அவர்களுடைய பணி பற்றி எடுத்துக்கூறியதையும் காண முடிகிறது.


அதன் இடையே சீன வீரர்களுக்கு நிர்மலா சீதாராமன் ‘‘நமஸ்தே’’ (வணக்கம்) சொன்னார்.


ஆனால் அதன் அர்த்தத்தை விளங்கிக்கொள்ள முடியாத சீன வீரர்கள் குழப்பம் அடைந்தனர்; அதைப் புரிந்து கொண்ட நிர்மலா சீதாராமன் அவர்களிடம் நமஸ்தே என்றால் என்னவென்று தெரியுமா என்று கேட்டார்; அப்போது சீன வீரர்கள் பதில் அளிக்க இந்திய வீரர்கள் உதவ முயன்றனர்;


உடனே மந்திரி அவர்களை தடுத்து நிறுத்தி விட்டு, அவர்களே பதில் சொல்லவிடுங்கள் என்று சொன்னதையும், கடைசியில் அந்த அதிகாரி சரியான அர்த்தத்தை சொல்லி விட்டதையும் வீடியோவில் பார்க்க முடிந்தது.


அந்த அதிகாரி கடைசியில் ‘நமஸ்தே’வுக்கு மாற்றாக சீன மொழியில் ‘நி ஹாவோ’ என்ற வார்த்தை பயன்படுத்தப்படுவதையும் எடுத்துக்கூறினார்.
ராணுவ மந்திரி நிர்மலா சீதாராமன், தங்களிடம் வெகு இயல்பாக வந்து பேசியது, சீன வீரர்களுக்கு மகிழ்ச்சியை அளித்தது.



----------------
தினத்தந்தி