'டாஸ்மாக்' கடைகளில் விரைவில் டிஜிட்டல் பரிவர்த்தனை

அனைத்து, 'டாஸ்மாக்' கடைகளிலும், டிஜிட்டல் பண பரிவர்த்தனை,
அமல்படுத்தப்பட உள்ளது.

தமிழக அரசின், டாஸ்மாக் நிறுவனத்திற்கு, 5,000க்கும் மேற்பட்ட
மதுக்கடைகள் உள்ளன. இவற்றில், தினமும் சராசரியாக,
70 கோடி ரூபாய்; விடுமுறை நாட்களில், 100 கோடி ரூபாய்க்கும்
அதிகமான, மது வகைகள் விற்பனையாகின்றன.

அவ்வளவு தொகையும், ரொக்க பண பரிவர்த்தனையில்
நடக்கின்றன.

சென்னை, மதுரை உள்ளிட்ட முக்கிய நகரங்களில், 50க்கும்
குறைவான, நவீன டாஸ்மாக் கடைகள் உள்ளன.அவற்றில்
, 'டெபிட், கிரெடிட் கார்டு' வாயிலாக, பணம் செலுத்தும், 'ஸ்வைப்'
கருவிகள் வழங்கப்பட்டுள்ளன.

மத்திய அரசு, டிஜிட்டல் பண பரிவர்த்தனைக்கு மாறும்படி,
அனைவரையும் வலியுறுத்தி வருகிறது. ஆனால், அதை
அமல்படுத்த, டாஸ்மாக் தொடர்ந்து தயக்கம் காட்டி வருகிறது.

இது குறித்து, டாஸ்மாக் அதிகாரி ஒருவர் கூறியதாவது:
கடை ஊழியர்கள், மது வகைகளுக்கு, அரசு நிர்ணயித்த விலையை
விட, கூடுதலாக விற்கின்றனர். இதனால் தான், நவீன கடைகளில்,
கார்டில் பணம் செலுத்தும் கருவி வழங்கியும், அதை, ஊழியர்கள்
பயன்படுத்துவது இல்லை.

அந்த கருவி உள்ள விபரத்தையும் தெரிவிப்பதில்லை.
செல்லாத ரூபாய் நோட்டுக்கள், டாஸ்மாக் வாயிலாக,
மாற்றப்பட்டதாக, குற்றச்சாட்டும் எழுந்தது.
இதனால், ஸ்வைப் கருவி, மொபைல் வாலட் போன்ற, டிஜிட்டல்
பண பரிவர்த்தனையை அமல்படுத்த வேண்டிய கட்டாயம்
ஏற்பட்டுள்ளது.

இது குறித்து, சமீபத்தில், வங்கிகளிடம் ஆலோசிக்கப்பட்டது.
விரைவில், அத்திட்டம் அனைத்து கடைகளிலும்
செயல்படுத்தப்படும். இதன் வாயிலாக, டாஸ்மாக் வங்கி
கணக்கில், உடனே பணம், டிபாசிட் ஆவதுடன், கொள்ளை,
கூடுதல் விலை போன்ற, முறைகேடுகள் நடக்காது.
இவ்வாறு அவர் கூறினார்.
-
---------------------------------
தினமலர்