பாரடைஸ் பேப்பர்ஸ்: 714 இந்தியர்கள் ரகசிய முதலீடு, பல்வேறு விசாரணை முகமைகள் குழு விசாரிக்கிறது

வெளிநாடுகளில் 714 இந்தியர்கள் ரகசிய முதலீடு செய்திருப்பதை
‘பாரடைஸ் பேப்பர்ஸ்’ ஆவணங்கள் அம்பலப்படுத்தி உள்ளது.

அரசியல்வாதிகள், தொழில் அதிபர்கள், திரையுலகினர் உள்ளிட்ட
பல்துறை பிரபலங்கள் அடங்குவார்கள். ‘பனாமா பேப்பர்ஸை’
அடுத்து மீண்டும் மிகப்பெரிய அளவில் வரி ஏய்ப்பு செய்யப்பட்டது
மற்றும் வெளிநாடுகளில் கருப்பு பணம் பதுக்கல் தொடர்பான
தகவல்கள் பாரடைஸ் பேப்பர்ஸ் மூலம் வெளியாகி உள்ளது.

‘பாரடைஸ் பேப்பர்ஸ்’ பட்டியலில் இடம்பெற்றிருக்கிற இந்தியர்கள்
பற்றிய தகவலை சுப்ரீம் கோர்ட்டு அமர்விடம் பிரதமர் வழங்குவாரா?
அவர்கள் மீது சி.பி.ஐ.யும், அமலாக்கப்பிரிவு இயக்குனரகமும்
நடவடிக்கை எடுக்குமா? என காங்கிரஸ் கேள்வி எழுப்பி உள்ளது.

இந்நிலையில் இப்போது வெளியாகியிருக்கும் இந்த தகவல்கள்
தொடர்பாக பல்வேறு விசாரணை முகமைகள் அடங்கிய குழு
விசாரிக்கிறது.

மாற்றியமைக்கப்பட்ட பல்வேறு விசாரணை முகமைகள் அடங்கிய
குழு இதுதொடர்பாக விசாரிக்க மத்திய அரசு உத்தரவிட்டு உள்ளது
என மத்திய நேரடி வரிவிதிப்பு ஆணையம் தெரிவித்து உள்ளது.

மத்திய நேரடி வரிவிதிப்பு ஆணையத்தின் தலைவர் தலைமையிலான
விசாரணை குழுவில் அவ்வமைப்பை சேந்த பிரதிநிதிகள்,
அமலாக்கப்பிரிவு, மத்திய ரிசர்வ் வங்கி மற்றும்நிதி நுண்ணறிவு
பிரிவினர் இடம்பெறுகிறார்கள்.

விரைவான சட்ட நடவடிக்கை எடுப்பதற்காக இந்திய வருமான
வரித்துறையின் விசாரணை குழுக்களும் கவனமாக இருக்க
கேட்டுக் கொள்ளப்பட்டு உள்ளது.
-
-----------------------------------
தினத்தந்தி