வாழ்வியல் எது? - கவிதை

-
எதைத் தேடிக்
கொண்டிருக்கிறோம்
இருபத்து நான்கு
மணி நேரமும்...
-
எதைப் பிடிக்க
ஓடிக் கொண்டிருக்கிறோம்
வாழ்நாள்
முழுமையும்...
-
காலை - மாலை
இரவு - பகல்
ஆதவனும் - வெண்ணிலவும்
ஓடும் ஆறும்...
-
வான் முட்டும்
மாமலைகள் - வனம்
முழுவதும் மலர்களின்
சுகந்தம்...
-
எங்கு எதைத்
தேடி ஓடுகிறோம்
எங்கே... எங்கே...
என எதற்காக அலைகிறோம்...
-
நாளை
பதவிக் காலம் முடிந்து
முதிர் வயதில்
என் நாளைக்கென...
தள்ளி விட்டு
நுரை தள்ளி ஓடும்
இந்த வாழ்வில்
எதைக் காண விழைகிறோம்...
-
சின்ன மழைத்துளியின்
சிறு புல்லின் நுனியில்
மகுடமான பனித்துளியில்
மலர்ந்து விரியும்
வானவில்லிலும் கூட...
-
ரசித்துப் பார்க்க
மணித்துளி செலவழிக்க
முடியாமல் - நேரமின்மை
நம்மை எந்த வாழ்வியலுக்கு
இட்டுச் செல்கிறது...
ஓடுபவர்களே...
கொஞ்சம் சொல்லிவிட்டுப்
போங்கள்!
-
------------------------
—ரஜகை நிலவன்,
மும்பை.
நன்றி- வாரமலர்