வன்முறை மிரட்டல்கள் ஜனநாயகத்தில் ஏற்புடையதல்ல: துணை ஜனாதிபதி கண்டிப்பு

புதுடெல்லி:

பத்மாவதி பட விவகாரத்தில் இயக்குநர் பன்சாலி மற்றும் நடிகை தீபிகா படுகோனே தலையை கொண்டு வருபவர்களுக்கு ரூ.1 கோடி பரிசு தொகை வழங்கப்படும் என சில தலைவர்கள் மற்றும் அமைப்புகள் கூறி வந்தன.

இந்நிலையில், டெல்லியில் நடைபெற்ற இலக்கிய விழா ஒன்றில் கலந்து கொண்ட துணை ஜனாதிபதி வெங்கையா நாயுடு பேசியதாவது:-

சில படங்கள் தங்கள் மதம் அல்லது சமூகத்தின் உணர்வுகளை புண்படுத்துகின்றன என சிலர் உணருகின்றனர். அதனால் எதிர்ப்புகள் கிளம்புகின்றன.

இந்த போராட்டத்தில் சிலர் பரிசுகளையும் அறிவிக்கின்றனர். இவர்களிடம் ரூ.1 கோடி அளவிற்கு பணம் இருக்கிறதா? அல்லது இல்லையா? என்பதே என் சந்தேகம். ஜனநாயகத்தில் இது ஏற்புடையதல்ல. நீங்கள் ஜனநாயக முறையில் போராட உரிமை உள்ளது. முறையான அதிகாரிகளிடம் செல்லுங்கள். உடல்ரீதியாக துன்புறுத்துவதோ, வன்முறை அச்சுறுத்தலோ ஏற்படுத்த முடியாது. சட்டவிதிகளை மீறக் கூடாது.


இவ்வாறு அவர் பேசினார்.

-
மாலைமலர்