டெல்லியில் செயல்படும் தமிழ்நாடு விருந்தினர் இல்லங்களின் பெயர் மாற்றம்: தமிழக அரசு அரசாணை வெளியீடு

சென்னை:
புதுடெல்லியில் செயல்படும் தமிழ்நாடு அரசு விருந்தினர்
இல்லத்தின் பெயர்களை மாற்றி தமிழக அரசு அரசாணை
பிறப்பித்துள்ளது.

தலைநகர் டெல்லியல் ஒவ்வொரு மாநில முதல்வர்கள், முக்கிய
பிரமுகர்கள் தங்குவதற்காக அந்தந்த மாநிலம் சார்பில்
இல்லங்கள் அமைக்கப்பட்டுள்ளன. தமிழக அரசு சார்பிலும்
டெல்லியில் தமிழ்நாடு அரசு விருந்தினர் இல்லம்
அமைக்கப்பட்டுள்ளது.

அதில் முன்னாள் முதல்வர் கருணாநிதி சார்பில் ஒரு இல்லமும்,
முன்னாள் முதல்வர் ஜெயலலிதா சார்பில் புதிய இல்லம் ஒன்றும்
கட்டப்பட்டுள்ளது. இந்த இல்லங்கள் டெல்லி சாணக்கியபுரியில்
கௌடில்யா மார்க் மற்றும் பீர் திக் ரன்ஜித் மார்க் ஆகிய இரண்டு
இடங்களில் உள்ளன.

இந்நிலையில், இந்த இல்லங்களின் பெயரை பழைய தமிழ்நாடு
இல்லம், புதிய தமிழ்நாடு இல்லம் என்பதற்கு பதிலாக முறையான
பெயர்களை வைத்து அழைத்தால் சிறப்பாக இருக்கும் என்று
முதன்மை உள்ளுறை ஆணையர் தமிழக அரசுக்கு கருத்துரு
அனுப்பினார்.

இதை தொடர்ந்து, தமிழக அரசு சார்பில் இல்லங்களின் பெயரை
மாற்றியமைத்து அரசாணை வெளியிடப்பட்டுள்ளது. அதில், பழைய
இல்லத்திற்கு ‘வைகை தமிழ் இல்லம்’ என்றும் புதிய இல்லத்திற்கு
‘பொதிகை தமிழ் இல்லம்’ என்றும் பெயர் மாற்றப்பட்டுள்ளது.
இதற்கான அரசாணையை தமிழக அரசு பிறப்பித்துள்ளது.
-
------------------------------------
தினகரன்