உள்ளதும், வெல்வதும்!

-

சொந்த வீடு இல்லை...
பறவைகள்
கூடு கட்டுவதை பார்!

உடுக்க துணி இல்லை...
சிலந்தி கட்டும்
இழைகளை பார்!

உண்ண உணவு இல்லை...
பறந்து திரியும்
காக்கை கரைவதைப் பார்!

உழைக்க வேலை இல்லை...
சாரை சாரையாய்
ஊர்ந்து செல்லும்
எறும்புகளை பார்!

இவைகளெல்லாம்
யாருக்காகவும் காத்திருப்பதில்லை
யாரையும் எதிர்பார்ப்பதுமில்லை!

உள்ளதை கொண்டு
உழைத்திட, அவைகள்
யாரிடமும் கற்றுக்கொள்ளவில்லை!

எல்லாம் கற்ற மனிதன்
உள்ளவைகளை விட்டு
உழைக்க மறந்து
எங்கோ பறக்க கனவு காண்கிறான்!

காலம் தேய்வதும்
கூடவே தானும் தேய்கிறான்
என்பது மட்டும் மிச்சம்!

புலிப் பாலுக்காக
அலைவதை விட
புல்லுக்கட்டு சுமந்திடுவது
மேல் அல்லவா!

என்றும்
உள்ளதை பயன்படுத்தி, பண்படுத்தி
உயர்வோம் எனும் உறுதி
வந்து விட்டால் எதையும்
வெல்வது விளையாட்டாகும்!

ஜனபிரவாகன், சென்னை.
வாரமலர்