இந்திய ராணுவத்துக்கு 126 போர் விமானங்கள்

வாஷிங்டன், ஜூலை 2: இந்திய ராணுவத்துக்கு புதிதாக 126 போர் விமானங்களை வாங்குவது தொடர்பாக அமெரிக்க நிறுவனங்களுடன் இறுதி கட்ட பேச்சுவார்த்தை நடத்தப்பட்டு வருகிறது. இத் தகவலை அமெரிக்க பாதுகாப்புத் துறை துணை அமைச்சர் மிஷெல் புளோர்னோய் தெரிவித்தார். வாஷிங்டனில் வெள்ளிக்கிழமை நடைபெற்ற ஆசிய நாடுகள் தொடர்பான கருத்தரங்கில் அவர் பேசியதாவது: அமெரிக்க ராணுவ தொழில்நுட்பத்தை இந்தியாவுடன் பகிர்ந்து கொள்வது தொடர்பாக மூன்று ஒப்பந்தங்கள் கையெழுத்தாக உள்ளன. இது குறித்து இந்திய தரப்புடன் பேச்சுவார்த்தை நடத்தி வருகிறோம். கடற்படையைப் பொறுத்தவரை இந்தியாவுடன் நெருக்கமான உறவு நீடிக்கிறது. அதேபோல், விமானப் படை மேம்பாட்டிலும் இந்தியாவுடன் உறவை மேம்படுத்த ஆர்வமாக உள்ளோம். வருங்கால பாதுகாப்பைக் கருத்திற் கொண்டு, அமெரிக்க போர் விமானங்களை வாங்க இந்தியாவிடம் பரிந்துரைத்துள்ளோம். அமெரிக்க நிறுவனங்களிடமிருந்து 126 போர் விமானங்களை வாங்குவது தொடர்பாக இந்திய தரப்பில் பேச்சுவார்த்தை நடத்தப்பட்டு வருகிறது. ரூ.50,000 கோடி மதிப்பிலான அந்த ஒப்பந்தம் நிறைவேறுவது இறுதிகட்டத்தில் உள்ளது. அதன்படி, எப் 18 மற்றும் எப் 16 ரக விமானங்களை இந்தியா வாங்கும். இவைத் தவிர சி-17 ரக போர் விமானங்களையும் இந்தியாவுக்கு அளிக்க அமெரிக்கா தயாராக உள்ளது. ராணுவத் தளவாடங்களை விற்பதன் மூலம் அமெரிக்காவின் வர்த்தகம் அதிகரிக்கும் என்பதை மறுக்கவில்லை. ஆனால், இந்திய, அமெரிக்க உறவு வெறும் விற்பனை மட்டும் சார்ந்தது அல்ல. அதையும் தாண்டி இரு நாடுகளும் பாதுகாப்புத் துறையில் ஒருங்கிணைந்து செயல்படுகின்றன என்றார் அவர்