கால்பந்து: உலக சாம்பியன் ஸ்பெயின்!

ஜோஹன்னஸ்பர்க்: கால்பந்தாட்டத்தில் புதிய உலக சாம்பியானானது ஸ்பெயின்.
நேற்று நடந்த இறுதிப் போட்டியில் அந்த அணி ஒரு கோல் அடித்து கோப்பையை
வென்றது.


ஜோஹன்னஸ்பர்க் சாக்கர் சிட்டியில் நடந்த இறுதிப்
போட்டியில் நெதர்லாந்து மற்றும் ஸ்பெயின் அணிகள் ஞாயிற்றுக்கிழமை மோதின.

முதல்பாதி
ஆட்டத்தில் இரு அணிகளுக்கும் கோல் அடிப்பதற்கான பல வாய்ப்புகள் கிடைத்தும்
எதையும் கோலாக்க முடியவில்லை. அந்த அளவு இரு அணிகளும் முரட்டுத்தனமாக
மோதிக் கொண்டன.

முதல் 15 நிமிடங்கள் ஸ்பெயின் வசமே பந்து
சுற்றிக்கொண்டிருந்தது. 11-வது நிமிடத்தில் ஸ்பெயின் வீரர் டேவிட் வில்லா
அடித்த ஷாட், வலைக்கு வெளியே சென்று ஏமாற்றியது.

இதன் பிறகு
நெதர்லாந்து தனது தாக்குதலை தீவிரப்படுத்தியது. 17-வது நிமிடத்தில்
பிரிஹிக் வாய்ப்பில் ஸ்னீடர் கோல் நோக்கி அடித்த ஷாட்டை, ஸ்பெயின் கோல்
கீப்பர் கேசில்லாஸ் தடுத்து விட்டார். அதே நேரம் இரு அணியினரும்
முரட்டுத்தனமாக மோதிக் கொண்டனர்.

வீரர்கள் ஒருவருக்கொருவர்
மிதிப்பதும் தள்ளிவிடுவதுமாக இருந்தனர். நடுவரிடமும் அடிக்கடி வாக்குவாதம்
செய்தனர். முதல் பாதி நேரத்தில் கோல் ஏதும் விழாத நிலையில், நெதர்லாந்து
தரப்பில் 3 பேரும், ஸ்பெயின் தரப்பில் 2 பேரும் மஞ்சள் அட்டை பெற்றனர்.

2-வது
பாதியிலும் இதே நிலையே காணப்பட்டது. குறிப்பாக நெதர்லாந்து அணி வீரர்களே
அதிக தவறுகள் செய்து நடுவரால் எச்சரிக்கப்பட்டனர். வெற்றிக்குரிய கோலைப்
போட, இரு அணி வீரர்களும் அடிக்கடி எதிரணி கோல் கம்பத்தை முற்றுகையிட்டபடி
இருந்தனர்.

வழக்கமான ஆட்ட நேரம் முடியும்வரை இரு அணியாலும் கோல்
அடிக்க முடியவில்லை.

இதையடுத்து 30 நிமிடங்கள் கூடுதல் நேரம்
தரப்பட்டது. அதன் முதல் பாதியும் கோல் இல்லாமலேயே முடிந்தது. இரண்டாவது
பாதி ஆட்டம் முடிவதற்கு 4 நிமிடங்கள் இருந்தபோது, ஸ்பெயின் அணியின்
இனியெஸ்டா அற்புதமாகக் கோல் அடித்தார். அதுவே வெற்றிக்கான கோலாகவும்
அமைந்தது.

இதன்பிறகு இருந்த மிகக் குறைந்த நேரத்தில் நெதர்லாந்து
வீரர்களால் கோல் எதுவும் அடிக்க முடியவில்லை இதனால், 1-0 என்ற கோல்
கணக்கில் ஸ்பெயின் அணி வெற்றி பெற்று உலகக் கோப்பையைக் கைப்பற்றியது.

கோலடித்த
இனியெஸ்டா ஆட்ட நாயகனாகத் தேர்ந்தெடுக்கப்பட்டார்.

ஸ்பெயின்
கால்பந்து சாம்பியனானது இதுவே முதல் முறை.