உயிரின் ஏக்கம்!

ஏக்கம் மெல்லென எழுந்து
தாக்கம் சிலவற்றை எடுத்துரை என்றது
வளம் பல நிறைந்த அழகான பூமியிலே
சொத்துக்கள் பல சேர்த்து
சோகமின்றி வாழ்ந்தவரும்...

பெற்றோரை இழந்து பெருங்கவலை அடைந்தவரும்

முத்தான முகவரியுடன் முழுமையுடன் வாழ்ந்தவரும்
பிணிகளிற் கடிமையாகி வாழ்விற் பிடிப்பேதுமின்றி
இறந்த கால வாழ்வை நினைக்கையில்
எழுவதும் ஏக்கமே!

எமது மண்ணை என்றுதான் தொடுவது
எம் சுற்றத்தோடு எப்போது சேர்வது - என
நம்பிக்கை மனமதில் கொண்டு
நம்மினம் வாழ்வதும் ஏக்கத்தில்!

சுற்றம் மறந்து பற்றும் பாசமும்
மண்மீது கொண்டு பகலிரவாய் பாடுபட்டு
எதிரி படையோடு போராடச் செல்லும்
வீரனுக்கு களமதில் வாகை சூடும்வரை ஏக்கமே!

தஞ்சம் கேட்டு வந்த நாட்டில் - மகன்
மஞ்சம் அமைத்தது கண்டு தம்மை
காண வருவானா என ஆவலுறும்
பெற்றோரின் மனதில் எழுவதும் ஏக்கமே!

கிபீர் குண்டுபோட கிட்ட வருகையில்
திடீரென ஓடி
பதுங்கு குழிக்குள் பலரும் ஒன்றாய்
பதுங்கையில் எழும் ஏக்கம்
எப்போதும் மனம் தனில் தாக்கம்!

காதலென்னும் வலைக்குள் வீழ்ந்து
காலம் முழுக்க சுகமாக வாழ நினைத்து
கனவது நனவாக
கண்ணீருடன் காலம் கழிக்கும்
காரிகையின் வாழ்வும் ஏக்கமே!

நினைவெல்லாம் நிஜமாகி
நிற்குமிடம் திடமாகி
மனமெல்லாம் செழிப்பாகி
நம் நாட்டில் வாழும்வரை
எம் வாழ்க்கை ஏக்கமே!

(பிரசுரம்: கலையோசை, ஜேர்மனி)