மனச்சோர்வுக்கு சிகிச்சை அளிக்கும் போது…

மனதில் ஏற்படும் ஏதேனும் ஒரு கவலை அல்லது பிரச்னை, மனதை பாதித்து அதுவே மனச்சோர்வு எனும் மன நோயாக மாறுகிறது. மனச் சோர்வு நோய்க்கு நிச்சயமாக சிகிச்சை அளிக்க வேண்டியது அவசியம்.

மனச்சோர்வுக்கு சிகிச்சை அளிக்கும் முறைகள் பல வகைப்படுகின்றன. அதில் மனச்சோர்வடைந்தவரிடம் பேசி அவருக்குள்ள பிரச்னை கண்டறியப்பட்டு அதற்கு தீர்வு காண்பதாகும்.

ஆனால், சில மருத்துவமனைகளில் உள்ள மனநல நிபுணர்கள், முதலில், பாதிக்கப்பட்டவரையும், அவரது குடும்பத்தாரையும் சந்தித்துப் பேச விரும்புவார்கள். இதன் மூலம் பிரச்னை எந்த இடத்தில் இருக்கிறது என்பதை அவர்கள் உணர வாய்ப்பு ஏற்படும். இந்த சிகிச்சையின் போது, நீங்கள் இவ்வாறு நடந்து கொள்வதுதான் அவரது மனச்சோர்வுக்குக் காரணம் என்று கூறினால், அது உங்களை குறை கூறுவதாக எடுத்துக் கொள்ளாமல், அவருக்குள்ள பிரச்னையை கண்டறிந்து, அதற்கு தீர்வு காண நீங்கள் உதவப் போகிறீர்கள் என்று உணருங்கள்.

மேலும், குடும்ப உறுப்பினர்களை சந்தித்துப் பேச சில சமயம் மருத்துவர்கள் விரும்புவார்கள். அதற்கு ஒத்துழைப்பு அளிக்க வேண்டியது மிகவும் அவசியம். சிகிச்சை துவங்கி சில காலம் காத்திருக்க வேண்டியது அவசியம். ஏன் எனில், ஒவ்வொருவரிடமும் பேசி, மனச்சோர்வுக்கான காரணத்தைக் கண்டறிந்து, அதுதான் பிரச்னையா, அது மட்டும்தான் பிரச்னையா என்பதை உறுதி செய்து கொள்ள மனநல மருத்துவர்களுக்கு சிறிது காலம் பிடிக்கலாம். அதுவரை அவர்களது முயற்சிக்கு ஒத்துழைப்பு அளிக்க வேண்டியது குடும்பத்தினரின் முக்கியக் கடமையாகும்.

சில சமயம், மனச்சோர்வு அடைந்தவர் பள்ளி, கல்லூரியில் படிப்பவராகவோ, ஊழியராகவோ இருப்பினர், அவர் சார்ந்திருக்கும் நிறுவனத்திலும் அவரைப் பற்றிய அறிக்கை கேட்கப்படுகிறது. இது அவரது மனச் சோர்வுக்கான சிகிச்சையை விரைந்து செய்ய வழி ஏற்படுத்தும்.

ஒரு காய்ச்சலுக்காக மருத்துவமனை சென்றால், மருந்து, மாத்திரை கொடுப்பார்கள் அதை சாப்பிட்டதும் காய்ச்சல் சரியாகிவிடும். ஆனால், மனச்சோர்வுக்கு அவ்வாறு மருந்து, மாத்திரைகளைக் கொடுத்து சரி செய்ய முடியாது. எனவே, அவரது ஆழ்மனதில் பதிந்துள்ள ஒரு பிரச்னையை வெளியில் கொண்டு வந்து, அதனை சரி செய்து, அவரது மனதில் உள்ள சோர்வை நீக்குவதற்கு சில காலம் பிடிக்கலாம். அதுவரை குடும்பத்தினர் முழு ஒத்துழைப்புக் கொடுத்து சிகிச்சைக்யை தொடர வழி வகுக்க வேண்டும். மேலும், மனச் சோர்வு ஏற்பட்டவருக்கு நமது ஆதரவையும், அன்பையும் காட்ட வேண்டும்.

சில சமயங்களில் பாதிக்கப்பட்டவர், தொடர்ந்து சிகிச்சைக்கு வர விரும்புவதில்லை. அதற்காக கோபத்தையோ, தாக்குதலையோக் கூட வெளிப்படுத்தலாம். எனினும், குடும்பத்தார், அவருக்கு பல வழிகளில் விளக்கி, சிகிச்சையைத் தொடர வாய்ப்பை ஏற்படுத்த வேண்டும்.

மனச்சோர்வு ஏற்படக் காரணமாக சில விஷயங்கள் நடந்திருப்பதை நீங்கள் அறிந்திருந்தாலோ, அதில் உங்களுக்கு தொடர்பிருந்தாலோ அதனை மருத்துவரிடம் மறைக்காமல் தெரிவிக்க வேண்டும். ஏனெனில், அது எளிதான தீர்வுக்கு வழி வகுக்கும். எனவே மனச்சோர்வுக்கு உடனடியாக சிகிச்சை எடுத்து அதனை குணப்படுத்த வேண்டியது அவசியம். தவறின், அதுவே மனநலப் பிரச்னையாக உருவெடுக்க வாய்ப்பு உள்ளது.
நன்றி -செந்தில்வயல்

தகவலுக்கு நன்றி