ஒரு பக்கக் கதை - தாரம்

by மகா பிரபு Wed Jul 17, 2013 11:21 am

சரவணன் திருமணமானவுடன் வாங்கும் முதல் சம்பளம் இது.

அவனுடைய இப்போதைய கவலையெல்லாம் சம்பளத்தை அம்மா ஜானகியிடம் கொடுப்பதா? இல்லை மனைவி சோபனாவிடம் கொடுப்பதா என்பதுதான்.

“இதுவரை அம்மாதான் எல்லாவற்றையும் கவனித்து வந்தாள். வீட்டு வாடகையில இருந்து, பால்காரன், மளிகைக் கடைக்காரன், குடிக்கிற தண்ணி வரைக்கும் யார் யாருக்கு எவ்வளவு கொடுக்கணும்னு அம்மாவுக்குத்தான் தெரியும். இவளுக்கு எப்படித் தெரியுமா?’

குழம்பிய மனநிலையுடனே வீட்டுக்கு வந்து சேர்ந்தான். “அத்தை கோயிலுக்கு போயிருக்காங்க’ என்று காபியை ஆற்றி அவனிடம் கொடுத்தபடி பேச ஆரம்பித்தார். “ஏங்க இன்னிக்கு உங்க சம்பள நாள்தானே...’

“ஆமாம்’

“இதோ பாருங்க, இந்த மாசம் பால்காரனுக்கு அறுநூறு ரூபாய். மளிகை கடைக்காரனுக்கு ஆயிரத்து முன்னூறு ரூபாய். வீட்டு வாடகையில் இருந்து குடிக்கிற தண்ணிவரைக்கும் எல்லாம் கணக்குப் போட்டாச்சு. மொத்தம் ஆயிரத்து ஐநூறு ரூபாய் ஆகுது.’

வேறு வழியில்லாமல் சம்பள கவரை மனைவியிடம் கொடுத்து “நீயே எல்லாத்துக்கும் கொடுத்துடு’ என்றான்.
“என்கிட்ட எதுக்கு குடுக்கிறீங்க. லிஸ்ட் மட்டுந்தான் நான் போட்டிருக்கிறேன்’ என்று தன்னிடம் உள்ள லிஸ்டை அவனிடம் கொடுத்து, “கொண்டு போய் அத்தை கிட்ட குடுங்க. என்னைக்குமே தாய்க்குப் பின் தாரம்’ என்றாள். பெரிய குழப்பத்திலிருந்து மீண்ட சந்தோஷம் சரவணனுக்கு.

- சேலம் ராமமூர்த்தி