கஸல்..

by கே.எஸ்.கலை Thu Jul 18, 2013 4:00 pm

தமிழனென்று சொல்லிநீ தலைநிமிர்ந்து நில்லடா
தரணியிலே மூத்தவனே நெஞ்சுயர்த்தி நில்லடா !

அற்புதமாய் வித்தைபல பெற்றவனே நில்லடா
ஆயக்கலைகள் அத்தனையும் கற்றவனே நில்லடா!

பகுத்தறிவு கொண்டவனே கொஞ்சம் நில்லடா
பரவிக் கிடக்கும் வன்முறைகள் பார்த்து நில்லடா !
==
சாதிக்காக மோதிநீ சாவதென்ன சொல்லடா
சாதிக்க இழிசாதி தேவையென்ன சொல்லடா !

சாத்திரங்கள் படித்தவனே கொஞ்சம் சொல்லடா
சாதியாலே கண்டதென்ன கொஞ்சம் சொல்லடா !

உதிரத்தில் இச்சாதி எங்கிருக்குச் சொல்லடா
உயரத்தில் சாதியைநீ வைப்பதுமேன் சொல்லடா !
==
சாதியைநீ துச்சமென்று சொல்லிப் பாரடா – நீ
செத்தபின்னர் மிச்சமென்ன எண்ணிப் பாரடா !

செங்குருதி சிந்துவதை நிறுத்தப் பாரடா
செழிப்போடு வாழத்தானே இந்தப் பாரடா ?

சாதிக்கொரு சுடுகாடு தேவை தானாடா ?
அந்த – சாதிக்கொரு சுடுகாடு தேவை தானடா !

சாதியின்றி வாழ்வதற்கு வழி இல்லையா
சாதியாலே புவியெங்கும் வலி இல்லையா ?

தமிழனென்று சொல்லிநீ தலைநிமிர்ந்து நில்லடா
சாதியெனும் போதுநீ தலைக்கவிழ்ந்து நில்லடா !
----
கஸல் என்பது ஈரடி சந்தங்கள் கொண்ட, மீளவரும் பல்லவியுடன் அமைந்த கவிதை வடிவாகும்.