மழைக் காலத்துக்கான ஸ்கின் டிப்ஸ்!

by ஸ்ரீராம் Fri Aug 30, 2013 11:06 am

கொளுத்தும் வெயிலால் மட்டுமல்ல; கொட்டும் மழை பனியாலும் நம் சருமம் பெரும் பாதிப்புக்குள்ளாகும். இந்தக் காலத்தில், பொதுவான சில கவனக்குறைவுகள் உடல்நலக் குறைபாட்டை ஏற்படுத்திவிடும். இதைத் தவிர்ப்பதற்கான வழிகள் குறித்து அழகுக் கலை நிபுணர் ப்ரீத்தி அளிக்கும் ஆலோசனைகள் இங்கே...

போதுமான அளவு தண்ணீர் குடிக்காதது:

இந்தக் காலத்தில், அதிக அளவிலான மக்கள் போதுமான அளவுக்குத் தண்ணீர் அருந்துவது இல்லை. நீர்ப் பற்றாக்குறைவினால், தோல் பொலிவு இழந்து, அரிப்பு, எரிச்சல் போன்றவை ஏற்படுகின்றன. இதைத் தவிர்க்கவும், சருமம் ஆரோக்கியமாக இருக்கவும் ஒரு நாளைக்கு இரண்டரை முதல் மூன்று லிட்டர் தண்ணீர் குடிப்பது அவசியம்.

தீர்வு: கையில் எப்போதும் ஒரு தண்ணீர் பாட்டில் வைத்திருங்கள். அலுவலகத்தில் உங்கள் மேஜையின் மீது தண்ணீர் பாட்டில்வையுங்கள். இது தண்ணீர் குடிக்கும் பழக்கத்தை ஏற்படுத்தும். ஒரு நாளைக்கு எட்டு கிளாஸ் அளவுக்குத் தண்ணீர் குடியுங்கள். தண்ணீர் குடிக்க வேண்டும் என்பதற்காக ஒரே நேரத்தில் ஒரு லிட்டர், ஒன்றரை லிட்டர் தண்ணீர் குடிக்க வேண்டாம். இடைவெளிவிட்டு தண்ணீர் குடிக்கும்போது, சருமம் பொலிவுடன் இருப்பதை உணரலாம்.

சன் ஸ்கிரீனைப் புறக்கணிப்பது

பெரும்பாலானவர்கள் செய்யும் தவறு இது. 'மழைக் காலம் அல்லது குளிர்காலம்தானே, வெயில் அந்த அளவுக்கா அடிக்கிறது என்று எண்ணி, சன் ஸ்கிரீன் போடுவதைப் பலரும் தவிர்த்துவிடுவர். தட்பவெப்பநிலை என்னதான் குளிர்ச்சியாக இருந்தாலும், உங்கள் சருமத்தை சூரியனில் இருந்துவரும் புறஊதாக் கதிர் போன்றவற்றில் இருந்து பாதுகாக்க வேண்டியது அவசியம்.

தீர்வு: சூரியக் கதிர்வீச்சால் ஏற்படக்கூடிய பாதிப்பு என்பது நிரந்தரமானது. இது உங்கள் சருமத்தின் முதுமைத்தன்மையை விரைவுபடுத்தும். எனவே, எப்போதும் வீட்டைவிட்டு வெளியே செல்வதற்கு அரை மணி நேரத்துக்கு முன்பு, உங்கள் சருமத்துக்கு ஏற்ற சன் ஸ்கிரீன் போட்டுக்கொள்ள வேண்டும்.

சத்தான உணவு மற்றும் உடற்பயிற்சியைத் தவிர்ப்பது

மழைக் காலத்தில் உடற்பயிற்சி மற்றும் ஆரோக்கியமான சரிவிகித ஊட்டச்சத்துள்ள உணவை எடுத்துக்கொள்வதை தவிர்ப்பது வழக்கம். சரிவிகித ஊட்டச்சத்து கிடைக்காமை, போதிய உடற்பயிற்சியின்மை என்பது, உங்கள் சருமம் மற்றும் முடியைப் பாதிக்கும்.

தீர்வு: கேரட், பீட்ரூட் போன்ற காய்கறிகளில் அதிக அளவில் வைட்டமின், தாது உப்புக்கள் உள்ளன. அதேபோல இந்தப் பருவத்தில் அதிக அளவில் கிடைக்கும் ஆப்பிள், ஆரஞ்சு பழங்களை தினமும் சாப்பிட வேண்டும். தினசரி உடற்பயிற்சி செய்வது, உங்கள் சருமத்துக்கு போதிய நீர் கிடைப்பதை உறுதிப்படுத்தி எப்போதும் புத்துணர்வோடும் இளமையோடும் இருக்க உதவும்.

நீண்ட நேரம் வெந்நீர் குளியல்

குளிருக்கு இதமாக இருக்கும் என்று கொதிக்கக் கொதிக்க வெந்நீரில் குளிப்பது பலருக்கும் வழக்கம். இது உங்கள் உடலுக்கு வெப்பத்தை அளித்தாலும், சருமத்தில் வறட்சியை ஏற்படுத்திவிடும். சருமம் மென்மையாகவும் பாதுகாப்பாகவும் இருக்க, தோலில் இயற்கையாக சுரக்கும் பாதுகாப்புப் பசையை வெந்நீர் அகற்றிவிடும்.

தீர்வு: இதற்காக குளிர்ந்த நீரில் குளிக்க வேண்டும் என்றில்லை. உங்கள் சருமம் தாங்கிக்கொள்ளக்கூடிய அளவில் குளிர்ந்த நீரில் குளியுங்கள். இது உங்கள் உடலில் ரத்த ஓட்டத்தை அதிகரிக்கும், சருமத்தில் உள்ள துளைகளைத் திறக்கும். இதனால், உங்கள் சருமம் பொலிவுடன் இருக்கும். நச்சுக்கள் வெளியேற்றப்படும். நோய் எதிர்ப்புச் சக்தி அதிகரிக்கும்.

தவறான கிளின்சர் மற்றும் மாய்ச்சரைஸர்

மாய்ச்சரைஸரை எல்லாப் பருவத்திலும் பயன்படுத்தலாம் என்று தவறானக் கருத்து உள்ளது. உங்கள் சருமத்துக்கு ஏற்ற கிளன்சர் மற்றும் மாய்ச்சரைஸரைப் பயன்படுத்தாதது சருமத்தில் பாதிப்பை ஏற்படுத்தும். பலரும் இந்தக் காலத்தில் மாய்ச்சரைஸர் க்ரீமை முழுமையாக சருமத்தில் பூசிக்கொள்வதும் இல்லை. இது உலர்வான சருமத்தை ஏற்படுத்தி சருமத் திசுக்களைப் பாதிக்கிறது.

தீர்வு: மழை மற்றும் குளிர் காலத்துக்கு நம் சருமத்துக்கு ஏற்ற கிளன்சர் மற்றும் மாய்ச்சரைஸரை சருமப் பராமரிப்பு நிபுணரை ஆலோசித்துப் பயன்படுத்துங்கள். கோடைக் காலத்தில் நீங்கள் பயன்படுத்திய கிரீம்களுக்குப் பதிலாக, சருமத்துக்கு நீர்ச்சத்து அளிக்கக்கூடிய அழுக்கு, தூசுகளை அகற்றும் கிரீம்களைப் பயன்படுத்துங்கள். உங்கள் சருமம் எளிதில் உட்கிரகிக்கக்கூடிய, எண்ணெய்த் தன்மைக்கொண்ட கிரீம்கள் சிறந்ததாக இருக்கும்.

நன்றி: பா.பிரவீன்குமார்@ டாக்டர் விகடன்