கடல் மனிதர்கள்!

வலை போட்டோம் கடலுக்குள்ளே
வாரிப் போட்டோம் படகுக்குள்ளே
அலையாடும் ஆட்டத்திலே
ஆடுகிறோம் குடும்பத்தோட..!
சூரியனை சந்திரனை
துணைக்கு வச்சுக்கிட்டோம்
கத்தி வீசும் காத்தைத்தான்
சொந்தம் ஆக்கிக்கிட்டோம்!
கட்டுமரத்தோட நாங்க
கடலுக்குப் போவோம்!
அந்தக் கடல் தண்ணி கரிப்பதுகூட
எங்க கண்ணீரால்தான்..
விதைக்கிறோம் வியர்வையைக்
கடலுக்குள்ளே
விளையுது மீன்களாய்
விக்கிறதுக்கு!
போர்க்கள உத்தியோகம்
பொழுதுக்கு மட்டும்!
போகிறோம் கடலுக்குள்ள
பொழுதுக்குப் பிறகும்!
களத்திலே யுத்தம் சில நாள் மட்டும்,
கடலிலே எங்க யுத்தம்
காலம் உள்ள மட்டும்!
மூன்று பக்கம் கடல்தான்
சூழ்ந்துகொண்டது உலகை
மூன்று பக்கம் கடன்தானே
சூழ்ந்ததெங்கள் வாழ்வை!
நடுக்கடலில் நெஞ்சுவலி
நாங்க எங்க போவோம்?
அடுக்களையா அங்க இருக்கு
அஞ்சு மருந்து கொதிக்க?
மழையில கரையல..
இடியில உடையல..
துயரோட தொடர்கிறோம்
வேற வழியின்றி..
உலகிலே நாங்களும் இருக்கோம்
பலபேரு அறியல..
பாவம் நாங்கங்க!



கவிதையாக்கம்
கவிஞர் சட்டநாதன்

கவிதை அருமை.
எழுதிய கவிஞர் சட்டநாதன் மற்றும் சகோதரிக்கு நன்றி

நன்றி நண்பா..