மனித உரிமைகள்

உயிரினங்கள் கோடி கோடி
ஓரறிவு முதல் ஆறறிவு வரை..
ஆயினும் ஆறறிவுள்ள மனிதனைத்தான்
ஆராதிக்கிறோம் உயிரென..
சிந்திக்கும் அறிவு பெற்றதால்
நிந்திக்கும் அறிவு வந்தது
ஆக்கும் ஆற்றல் பெருகப் பெருக
அழிக்கும் ஆற்றலும் ஆறாய் பெருகி
அழிக்கிறது மனிதம் அழிகிறது..
உயர்ந்த பிறவி பெற்றதால்
உரிமை பெற்றான்
உரிமைக்கு குரல் கொடுக்கும்
எழுச்சியும் கொண்டான்..
கொடுமை கண்டு பொங்குகிறான்
கொடுமை செய்வதும் அவனே
என்பதை மட்டும் மறக்கிறான்
மனித உரிமை மீறல் என்று
கொடி பிடித்து கொதிக்கிறான்
உரிமைக்கோடு தாண்டி
விதிகளின் குரல்வளை நெரித்து
கலவரக் குருதி குடிப்பதுவும்
மனிதனென்பதை மறந்து போகிறான்..
சாதியென்றும் மதமென்றும்
இனமென்றும் குலமென்றும்
உள்ளவநென்றும் இல்லாதவநென்றும்
எத்தனை எத்தனை ஏற்றத்தாழ்வுகள்..
எத்தனை எத்தனை குரோதங்கள்..
கலவரங்களுக்குத்தான் எத்தனை காரணங்கள்?
அனைத்துக்கும் ஒரே நிறம்
சிந்திச் சிதறும் ரத்தம்...
பச்சிளம் குழந்தைக்கும்
பாலியல் கொடுமை..
இவனும் மனிதனென்றால்
மனிதம் எங்கிருக்கிறது?
யார் மனிதன்?
மனிதனுக்கான உரிமைகள் எவை?
வகுத்தவனே வழி மாறுகையில்
உரிமைகள் வாழுமா
வாழவைக்கப்படுமா மனிதம்?
மனித உரிமைகளுக்கென
ஒரு தினமிருந்தால் மட்டும் போதுமா?
உரிமைகள் காக்க
மனிதன் மனிதனாயிருக்க வேண்டாமா?

கவிதை அருமை சகோதரி