தூக்கம் வந்தால், தூக்கம் போடுங்கள்!

by முழுமுதலோன் Mon Jan 20, 2014 10:21 am

'குட்டித் தூக்கம்’

தூக்கம் வந்தால், தூக்கம் போடுங்கள்!

ஆழ்ந்த அமைதியான உறக்கம்தான் மனிதர்களை இளமையாக வைத்திருக்கிறது என்று ஆய்வின் மூலம் நிரூபிக்கப்பட்டுள்ளது
பகல் வேளையில் தூக்கம் வருவதற்கு இரண்டு காரணங்கள் இருக்கின்றன. உடல் களைப்பாக இருக்கும் சமயத்திலோ அல்லது நன்றாகச் சாப்பிட்டு முடித்த பிறகோ, சுகமான தூக்க உணர்வு ஏற்படும். ஆரோக்கியமான உடல்வாகுகொண்ட அனைவருக்கும் ஏற்படும் இயல்பான நிலைதான் இது.

செரிமானத்தின்போது உணவில் உள்ள கொழுப்புச் சத்தானது ரத்தத்தில் கலக்கும். அப்போது ஒருவிதக் கிறக்க நிலை எல்லோருக்கும் உண்டாகும். இதைத்தான் 'உண்ட மயக்கம் தொண்டனுக்கும் உண்டு’ என்கிறார்கள். எல்லோருக்கும் பொதுவான - இயல்பான இந்த நிலையைத்தான் 'குட்டித் தூக்கம்’ என்கிறார்கள்.

அதிகப்படியாக 30 நிமிடங்கள்தான் குட்டித் தூக்கத்தின் ஆயுட்காலம். இதனால், உங்களது அன்றாட வேலைகளில் எந்தவிதப் பாதிப்பும் இல்லை என்றால், இந்தக் குட்டித் தூக்கம் வரவேற்கத்தக்கதே.

''இரவுத் தூக்கத்தில்கூடக் கிடைக்காத புத்துணர்வும் உற்சாகமும் இந்தக் குட்டித் தூக்கத்தில் கிடைக்கிறது சிலரோ, 'பகலில் எந்நேரமும் தூக்கம் வருகிறது; தூங்கி எழுந்தாலோ இரவு நேரத்தில் தூக்கம் வரமாட்டேன் என்கிறது’ எனக் குறைபட்டுக் கொள்வார்கள். இரவில் ஆழ்ந்த தூக்கம் இல்லாததே, இதுபோன்ற தொல்லைகளுக்கான முக்கியக் காரணம்.

அதிகாலையிலேயே எழுந்து பாடம் படிக்கும் மாணவர்கள் அல்லது வேலைக்குச் செல்லும் இளம் வயதினர் சிலர் 'கிளாஸ் ரூமிலேயே தூங்கி வழிகிறேன்; அலுவலக நேரத்தில் கம்ப்யூட்டரிலேயே தலையைச் சாய்த்துக்கூடத் தூங்கிவிடுகிறேன். என்னால் கட்டுப்படுத்தவே முடியவில்லை’ என்று அலுத்துக்கொள்வார்கள்.

ஸ்பெயின் வழக்கம்!
ஸ்பெயின் நாட்டில் உள்ள பெரும்பாலான அலுவலகங்களில் தங்களது ஊழியர்கள் குட்டித் தூக்கம் தூங்கி எழுவதற்குத் தேவையான தனியறை வசதிகளையே செய்து கொடுத்து இருக்கிறார்கள். காரணம்... இப்படித் தூங்கி எழுந்தவர்கள் இரட்டிப்புப் புத்துணர்வுடன் அலுவலகப் பணிகளை விரைந்து முடிப்பதால், உற்பத்தியும் இரண்டு மடங்கு அதிகரிக்கிறதாம். ஸ்பானிஷ் கலாசாரத்தில், இதனை 'சியஸ்டா’ (Siesta பிற்பகலில் எடுத்துக்கொள்ளும் சிறு துயில்) என்று அழைக்கிறார்கள். எனவே, மதிய சாப்பாட்டுக்குப் பின்னர் தூக்கம் வருகிறது என்று குறைப்பட்டுக்கொள்ளாதீர்கள். தூக்கம் வந்தால், தூக்கம் போடுங்கள்!

https://www.facebook.com/