சபரிக்கு முக்தியளித்த ஐயப்பன்

சபரிக்கு முக்தியளித்த ஐயப்பன்


‘‘இங்கே சபரி பீடம் என்று ஓர் இடம் உண்டு. இங்கே, பக்தர்கள், ஆளுக்கு ஒரு முழுத் தேங்காயை உருட்டி விடுவார்கள். அதோடு இந்த பீடத் துக்குக் கற்பூர தீபம் காட்டியும் வழிபடுவார்கள்.’’ ‘‘சபரி பீடத்துக்கு அப்படி என்ன சிறப்பு சாமி?’’ ‘‘சொல்கிறேன். ராமாயண சபரி எத்தனைப் பேறு பெற்றவர்! ராமனுக்காகக் காத்திருந்து, அவர் வந்தபோது, அவருக்காக, பலவகைக் கனிகளைச்  சேகரித்து, அவருக்கு அளித்தது மட்டுமல்ல; அவையெல்லாம் சுவையாக இருக்குமோ  இருக்காதோ என்று, தானே அவை ஒவ்வொன்றையும் கடித்து ருசி பார்த்து, புளித்தன, சுவையற்றன என்று தரம் பிரித்து, மிகச் சிறந்த ருசி உள்ள கனிகளை  மட்டுமே அளித்தவர் அல்லவா?’’

‘‘ஆமாம்.’’ ‘‘அந்தச் சபரி தவமிருந்த திருத்தலம் இது. அதனாலேயே அந்த அம்மையார் பெயராலேயே இந்த இடம் சபரி பீடம் என்றே அழைக்கப்படுகிறது. அம்மையாரின் ஆழ்ந்த ராம பக்திக்கு மரியாதை செலுத்தி, ஐயப்பன் தரிசனம் தந்து, அவருக்கு முக்தியளித்தார். அதனாலேயே இந்தப் பரந்த மலை, சபரிமலை என்று அழைக்கப்படுகிறது. அதாவது, நீலிமலையில் சபரி பீடத்துக்குப் பிறகு தொடரும் பகுதிக்குச் சபரிமலை என்று பெயராகும்!’’ ‘‘இந்தக் கட்டத்துக்குப் பிறகு அடுத்துச் செல்ல வேண்டியது சாஸ்தாவின் சன்னிதானம்தானே சாமி?’’  

‘‘ஆமாம். ஆனால், அதற்கு முன், ‘சரங்குத்தி ஆல்!’ வரும். நான் ஏற்கெனவே சொன்ன மாதிரி, எருமேலியில் பேட்டைத் துள்ளல் நிகழ்த்திய கன்னிசாமிகள், அங்கே தாம் பெற்றுக்கொள்ளும் சரக்கோலை இங்கே இருக்கும் ஆலமரத்தில் குத்தி, கருப்புநாடாவை, மாட்டி வைக்கவேண்டும்; அல்லது நாடாவை மரத்தடியிலும் சமர்ப்பிக்கலாம். இது, மகிஷமுகியின் கணக்கெடுப்புக்காக. எந்த வருடமாவது கன்னிசாமிகள் வராமலிருக்க மாட்டார்களா, அந்த வருடமாவது ஐயப்பன் தன்னைத் திருமணம் செய்து கொள்ள மாட்டாரா என்று ஏங்கிக் காத்திருக்கிறாளே அவளுடைய கணக்கெடுப்புக்காக..’’

(பிரபுசங்கர் எழுதிய சபரிமலை யாத்திரை ஒரு வழிகாட்டி புத்தகத்திலிருந்து)

நன்றி: தினகரன்