கடமையை மறக்காத மூதாட்டி

கோவை: முதியோர் உதவித்தொகைக்காக பல ஆண்டுகளாக போராடியும் கிடைக்காத 100 வயது மூதாட்டி, தனது சோகத்திலும் ஜனநாயக கடமையை தவறாமல் நிறைவேற்றினார்.

கிணத்துக்கடவு அருகேயுள்ள முத்துக்கவுண்டனூர் கிராமத்தைச் சேர்ந்தவர் கிருஷ்ணசாமி. இவரது மனைவி ரங்கம்மாள், 100. கணவர் கிருஷ்ணசாமி 25 ஆண்டுகளுக்கு முன், இறந்து விட்டார். கணவர் இறந்த பின், பெற்ற மகன்களும், மருமகளும் அடுத்தடுத்து இறந்து விட்டனர். இவர்களில் இளைய மகனுக்கு திருமணம் ஆகவில்லை. மூத்த மகனுக்கு பிறந்த பேரனுடன் வசித்து வருகிறார் மூதாட்டி ரங்கம்மாள். சம்பாத்தியமே இல்லாத தனக்கு உதவ யாரும் இல்லை. ஊர் ஜனங்களுக்கு ஓய்வூதியம் கொடுக்கும் அரசு, எனக்கு இதுவரை தரவில்லை. பலமுறை கிராம நிர்வாக அதிகாரி, கிணத்துக்கடவு ஆர்.ஐ.,மற்றும் பொள்ளாச்சி தாசில்தார் அலுவலகம் சென்றும், முதியோர் உதவித்தொகை கிடைக்கவில்லை. பேரனுக்கு கிடைக்கும் சொற்ப வருமானத்தில், வாழ்க்கையை ஓட்டி வருகிறார்.

கடந்த சில நாட்களுக்கு முன் வீட்டுக்கு ஓட்டு கேட்டு வந்த கட்சிக்காரர்கள், பேரனிடம் மட்டும் ஓட்டுக் கேட்டுச் சென்று விட்டனர். ஆனாலும் நேற்று, பேரன் உதவியுடன் ஓட்டுச்சாவடிக்கு நடந்து சென்ற மூதாட்டி, தனது விருப்பமான சின்னத்துக்கு ஓட்டுப்போட்டு விட்டு திரும்பினார். இவரிடம், ஓட்டுப்போட்ட அனுபவம் குறித்து கேட்டபோது, ''எனக்கொன்றும் புதிதாக தோன்றவில்லை. வழக்கமாக போடும் சின்னத்தில் ஓட்டுப்போட்டு விட்டேன். அடுத்து வரும் தேர்தலிலும் ஓட்டுப்போட தயாராக இருக்கிறேன்,'' என்றார், பெருமிதத்துடன். அருகில் இருந்த கட்சிக்காரர், 'நான் சொன்ன சின்னத்தை காதில் வாங்கிக் கொள்ளாத பாட்டி, வழக்கமாக போடும் சின்னத்தில் ஓட்டு போட்டு விட்டார்' என்றார், லேசான அதிருப்தியுடன்.

நன்றி: தினமலர்

      

படிக்காத மூதாட்டி கடமையை மறக்க வில்லை ஆனால் படித்த முட்டாள்கள், அரசாங்கம் அளித்த லீவை வீட்டில் உட்கார்ந்து கொண்டு கொண்டாடி இருக்கிறார்கள். தென் சென்னை, சென்னையின் படித்த பணக்காரர்கள் வசிக்கும் பகுதி, வாக்கு பதிவு 50% மட்டுமே. எங்கே போய் சொல்வது??

படிக்காத மூதாட்டி கடமையை மறக்க வில்லை ஆனால் படித்த முட்டாள்கள், அரசாங்கம் அளித்த லீவை வீட்டில் உட்கார்ந்து கொண்டு கொண்டாடி இருக்கிறார்கள். தென் சென்னை, சென்னையின் படித்த பணக்காரர்கள் வசிக்கும் பகுதி, வாக்கு பதிவு 50% மட்டுமே. எங்கே போய் சொல்வது??