மலரும் மருத்துவமும்

by முழுமுதலோன் Thu May 01, 2014 10:08 am

அழகிற்காகவும், ஆராதனைக்காகவும் மட்டுமல்லாது மலர்கள் பச்சிலைகளைப் போல நோய் தீர்க்கும் மருந்துகளாகவும் மருத்துவத்தில் சிறப்பான இடத்தைப் பெற்றுள்ளன.

அகத்திப்பூ: இது எலும்புகளையும், பற்களையும் வளரச் செய்யும். சுண்ணாம்புச் சத்துக்களை அதிகம் பெற்றுள்ளது. ஜீரண சக்திக்கும் மலச்சிக்கலை போக்கவும் இந்த மலர்கள் உதவுகின்றன. இதை சமையல் செய்தும் சாப்பிடலாம்.

அல்லிப்பூ: நீரிழிவை நீக்க வல்லது. புண்களை ஆற்றும் வெப்பச் சூட்டால் ஏற்படும் கண் நோய்களைப் போக்க வல்லது. இதை சர்பத்தாகச் செய்து சாப்பிடலாம்.

இலுப்பைப்பூ: இலுப்பைப் பூவை சர்க்கரையுடன் சேர்த்து அரைத்து காய்ச்சிய பாலுடன் கலந்து சாப்பிட்டு வந்தால் உடல் வலிகள் குறையும். இருமல் குறையவும் இது அனைவருக்கும் உதவும்.

கண்டங்கத்தரிப்பூ: மூல நோய்க்கு இந்தப்பூ கண் கண்ட மருந்து. வாதுமை நெய்யில் கண்டங்கத்தரிப் பூக்களைப் போட்டு காய்ச்சி மூலம் உள்ள இடத்தில் தடவ மூலநோய் குணமாகும்.

குங்குமப்பூ: பல விதமான நோய்களைப் போக்குவதில் குங்குமப்பூ தன்னிகரற்றுத் திகழ்கிறது. தலை வலி, கண் நோய் நீக்கும். கர்ப்பிணி பெண்கள் வெற்றிலையுடன் இந்தப் பூவையும், ரோஜா இதழ்களையும் சேர்த்து சாப்பிட்டால் நல்ல செரிமானம் ஏற்படும். காய்ச்சிய பசும்பாலில் குங்குமப்பூவை கலந்து பருகினால் சுகப்பிரசவம் உண்டாகும்.

செண்பகப்பூ: இந்தப் பூக்களை நல்லெண்ணெய் விட்டு பிசைந்து நெற்றியில் பற்று போட்டால் தலைவலி, வாதவலி போன்றவை குணம் பெறும்.

சம்பங்கிப்பூ: காய்ச்சிய பசும்பாலில் இந்தப்பூவை போட்டு சாப்பிட்டு வந்தால் உடல் நல்ல வலிமை பெறும்.

சூரியகாந்திப்பூ: இந்தப் பூவிலுள்ள விதைகளில் இருந்து எடுக்கப்படும் எண்ணெய் உடல் பலம் அளிப்பதோடு இருதய நோய்க்கும் நன்மை தருவதாக உள்ளது.

செம்பருத்திப்பூ: வெட்டைச் சூடு நீங்க தினமும் காலையில் வெறும் வயிற்றில் சுத்தம் செய்யப்பட்ட பூவை சாப்பிட்டு வரலாம். உடல் உஷ்ணமும் தணியும்.

தாழம்பூ: இதில் எடுக்கப்படும் தைலம் வாதவலி போன்றவற்றை போக்க வெகுவாக உதவுகிறது.

தாமரைப்பூ: இந்தப் பூ இதயத்திற்கு பலம் அளிக்கவல்லது. உடல் வெப்பத்தை தணித்து இரத்த நாளத்தை சீர் செய்ய வல்லது.

muganool