ரூபாய் வெளிமதிப்பு அதிகரிப்பு.

by நாஞ்சில் குமார் Wed May 21, 2014 3:24 pm

டாலருக்கு நிகரான ரூபாய் வெளிமதிப்பு அதிகரிப்பால் பெட்ரோலியம், உரம், மின்சாரம் ஆகிய துறைகளைச் சேர்ந்த பல நிறுவனங்களின் வருவாய் அதிகரிக்கும். அதேசமயம் மருந்து, மோட்டார் வாகனம், ஜவுளி மற்றும் உருக்குத்துறைகளைச் சேர்ந்த நிறுவனங்களுக்கு பாதிப்பு ஏற்படும் என நிபுணர்கள் தெரிவித்துள்ளனர்.

கடந்த 8 மாதங்களில்...

டாலருக்கு நிகரான ரூபாய் வெளிமதிப்பு திங்கள்கிழமை அன்று 11 மாதங்களில் இல்லாத அளவிற்கு 58.60–ஆக உயர்ந்து இருந்தது. இந்நிலையில் ரிசர்வ் வங்கி டாலரை அதிக அளவில் வாங்கியதையடுத்து நேற்று ரூபாய் வெளிமதிப்பு 58.74–ஆக குறைந்தது. எனினும் கடந்த எட்டு மாதங்களில் இது 15 சதவீதம் அதிகரித்துள்ளது.

இந்தியன் ஆயில், பாரத் பெட்ரோலியம், இந்துஸ்தான் பெட்ரோலியம் ஆகிய பொதுத்துறை எண்ணெய் நிறுவனங்கள் டீசல், மண்எண்ணெய், சமையல் எரிவாயு ஆகியவற்றை மத்திய அரசு நிர்ணயம் செய்த விலையில் விற்பனை செய்கின்றன. இது அடக்க விலைக்கும் குறைவாக இருப்பதால் வருவாய் இழப்பு ஏற்படுகிறது. கடந்த 2013–14–ஆம் நிதி ஆண்டில் ஏற்பட்ட வருவாய் இழப்பு சுமார் ரூ.1.40 லட்சம் கோடியாக உள்ளது.

கச்சா எண்ணெய்

ரூபாய் வெளிமதிப்பு அதிகரிப்பால் கச்சா எண்ணெய் இறக்குமதி செலவினம் குறைந்து வருவாய் இழப்பு குறையும். பொதுத்துறை எண்ணெய் நிறுவனங்கள் அண்மையில் டீசல் விலையை லிட்டருக்கு 1.09 ரூபாய் உயர்த்தின. இதன் காரணமாகவும், டாலருக்கு நிகரான ரூபாய் மதிப்பு உயர்ந்துள்ளதாலும், இம்மாதம் 15–ந் தேதி வரையிலான இரு வாரங்களில் ஒரு லிட்டர் டீசல் விற்பனையில் ஏற்படும் வருவாய் இழப்பு 4.41 ரூபாயாக குறைந்துள்ளது. இதற்கு முன்னர் இந்த இழப்பு 6.80 ரூபாயாக இருந்தது.

உர நிறுவனங்கள், பொட்டாஷ் மற்றும் பாஸ்பேட் போன்ற உரங்களை அதிக அளவில் இறக்குமதி செய்கின்றன. ரூபாய் மதிப்பு அதிகரிப்பது இத்துறை நிறுவனங்களுக்கு சாதகமான அம்சமாகும். இதன் காரணமாக கோரமண்டல் இன்டர்நேஷனல், சம்பல் ஃபெர்ட்டிலைசர்ஸ், ஆர்.சி.எஃப். ஆகிய நிறுவனங்கள் பயன்பெறும்.

மின்சாரம்

ரூபாய் மதிப்பு அதிகரிப்பதால் நிலக்கரியை வெளிநாடுகளிலிருந்து அதிக அளவில் இறக்குமதி செய்யும் மின்துறை நிறுவனங்கள் பயன்பெறும். குறிப்பாக டாட்டா பவர் மற்றும் அதானி பவர் ஆகிய நிறுவனங்களின் வருவாய் அதிகரிக்கும்.

மேலும் அன்னியச் செலாவணியில் கடன்பெற்றுள்ள நிறுவனங்களின் வட்டிச் செலவினம் குறையும். நரேந்திர மோடி தலைமையிலான பா.ஜனதா கூட்டணி பொருளாதார சீர்திருத்த நடவடிக்கைகளை மேற்கொண்டால் ஐசிஐசிஐ வங்கி, மாருதி சுசுகி, பாரத ஸ்டேட் வங்கி, எல்.ஐ.சி. ஹவுசிங் பைனான்ஸ், ஓபராய் ரியால்டி, எல்–டி, ஓ.என்.ஜி.சி, இந்துஸ்தான் பெட்ரோலியம், மதர்சன் சுமி, ஸ்ரீசிமெண்ட் ஆகிய 10 நிறுவனங்களின் பங்கு விலை உயர வாய்ப்புள்ளது என நிபுணர்கள் தெரிவித்துள்ளனர்.

மருந்து நிறுவனங்கள்

இந்திய மருந்து நிறுவனங்கள் தமது வருவாயில் பெரும்பகுதியை அமெரிக்கா மற்றும் ஐரோப்பிய நாடுகள் வாயிலாக ஈட்டுகின்றன. ரூபாய் மதிப்பு உயர்வால் இத்துறை நிறுவனங்களின் ஏற்றுமதி வருவாய் குறையும். குறிப்பாக, டாக்டர் ரெட்டீஸ் லேபரட்டரீஸ், லுப்பின், சிப்லா மற்றும் சன் பார்மா ஆகிய நிறுவனங்களுக்கு பாதிப்பு ஏற்படும் என நிபுணர்கள் தெரிவித்துள்ளனர். அதேசமயம் அன்னியச் செலாவணியில் அதிக அளவில் கடன்பெற்றுள்ள ரான்பாக்சி மற்றும் அரபிந்தோ பார்மா ஆகிய நிறுவனங்கள் பயன்பெறலாம்.

ரூபாய் மதிப்பு உயர்வதால் ஏற்றுமதி வாயிலாக அதிக வருவாய் ஈட்டும் மோட்டார் வாகனம் மற்றும் வாகன பாகங்கள் துறைகளைச் சேர்ந்த நிறுவனங்களுக்கும் பாதிப்பு ஏற்படும். ஆயத்த ஆடைகள் ஏற்றுமதியில் ஈடுபட்டு வரும் நிறுவனங்களுக்கும் பாதிப்பு ஏற்படும்.

உருக்கு பொருள்கள்

பொருளாதார மந்தநிலை காரணமாக உள்நாட்டில் உருக்கு பொருள்கள் விற்பனை குறைந்துள்ளது.

எனவே பல உருக்கு நிறுவனங்கள் ஏற்றுமதியை அதிகரிக்கும் நடவடிக்கைளில் இறங்கி உள்ளன. இந்த நிறுவனங்களுக்கு பாதிப்பு ஏற்படும்.

எதிர்பார்க்கப்படும் பொருளாதார முன்னேற்றத்தால் அன்னிய நிதி நிறுவனங்களின் பங்கு முதலீடு மற்றும் அன்னிய நேரடி முதலீடு அதிகரிக்கும் என எதிர்பார்க்கப்படுகிறது. எனவே டாலருக்கு நிகரான ரூபாய் மதிப்பு மேலும் அதிகரிக்க வாய்ப்புள்ளது.

நன்றி: தினத்தந்தி