கவிதைப் பதிவு

by kanmani singh Tue Jun 10, 2014 2:36 pm

என் நாட்குறிப்பு புத்தகத்தில்
பக்கங்கள் எல்லாம்
கவிப்பூக்களால் புனையப்பட்டவை....
காதல் மையூற்றி
கற்பனை பொய்யூற்றி
அடுக்கப்பட்ட
அலங்கரிக்கப்பட்ட
அழகூட்டப்பட்ட
வார்த்தைகளால் வடிவமைக்கப்பட்ட
வரிகளில் வீசியது வன வாசம்..
தனிமையை தட்டிக் கொடுத்து
தவிர்க்க விடாமல் தழைக்கவிட்டு
நீராழி நினைவுச் சுழலில்
அடி ஆழம் தொட்டது தனிமை!
நாட்குறிப்பு புத்தகம்
அணிந்து கொண்டது
தனிமை சட்டையை...
வெற்றுப் பக்கங்கள்
வெறுமனே விடுபடாமல்
பக்கங்கள் நிரப்பிக் கொண்டன
தனிமையின் கவிதைப் பதிவை...