வீட்டுக்கு பெயின்டிங் பண்ணப்போறீங்களா....

பச்சை, மஞ்சள், நீலம், ஆரஞ்ச், சிவப்பு என்று பல நூறு வண்ணங்கள் இருந்தாலும் வீடுகளை அழகுப்படுத்தும் வண்ணங்கள் காலத்திற்கு ஏற்ப, ரசனைக்கு ஏற்ப மாறி வருகிறது. கட்டி முடித்த புதிய வீட்டில் பெயின்டிங் ஒரு முறையிலும், பழைய வீட்டில் பெயின்டிங் மற்றொரு முறையிலும் இருக்கும். பெயின்டிங் வீட்டின் வடிவத்தையும், அழகையும் மேம்படுத்தி காண்பிக்கும். வீட்டில் வசிக்கின்றவர்களுக்கு மனரீதியாகவும் தாக்கத்தை ஏற்படுத்தும் திறன் வண்ணத்திற்கு உண்டு. கட்டுமான செலவில் குறிப்பிட்ட ஒரு தொகை அதாவது சுமார் 8 முதல் 12 சதவீதம் வரை பெயின்டிங்குக்கு செலவாகும் என்பது நிபுணர்களின் கருத்து.

உரிய முறையில் பெயின்டிங் செய்யாவிட்டால் வீட்டின் அழகு கெடுவதுடன் நமது பணத்தையும் இழக்க நேரிடும். பின்னர் வீட்டின் கட்டுமானத்திற்கும் ஆபத்தை ஏற்படுத்தி விடும். குறைந்தது 4 ஆண்டுகளுக்கு ஒருமுறையேனும் வீடுகளுக்கு வண்ணம் பூசுவது நல்லது. சுவர்களில், மேல்பாகத்தில் சிறு சிறு விரிசல்கள் ஏற்பட்டாலும் அவற்றை காற்று புகாமல் தடுத்து விரிசல் அதிகரித்து வீடுகளுக்கு சேதம் ஏற்படுவதை தடுக்கும் தன்மை பெயின்ட்டுக்கு உண்டு. பெயின்டிங் பற்றிய சில விஷயங்களை இப்போது தெரிந்து கொள்ளலாம்.

* கட்டுமான பணிகள் முடிந்த வீட்டில் முதல் முறையாக பெயின்டிங் செய்யும்போது ஜனதா செம், ஸ்னோசெம் போன்றவற்றை பூசுவது செலவு குறைந்த வழிகளில் ஒன்றாகும். எமல்ஷன் பெயின்டுகளுக்கு பதில் டிஸ்டம்பர் வகை பெயின்ட்களை பயன் படுத்தினாலும் செலவு குறையும். பெரும்பாலானோர் எமல்ஷன் வகை பெயின்ட்களை அதிகம் பயன்படுத்துகின்றனர்.

* புதிய வீடுகளில் சிமென்ட் பூச்சு முடிந்து மூன்று வாரத்திற்கு பின்னர் நேரடியாக சுவரை பாதுகாக்கும் புட்டி பூச வேண்டும். இது சுவர்களுக்கு நல்ல பலனை கொடுக்கும். முதலில் வெள்ளை சிமென்டோ, பிரைமரோ பூசுகின்றவர்கள் உள்ளனர். பிரைமர் பூசிவிட்டு புட்டி பூசக்கூடாது. பிரைமர் பெயர்ந்து சென்றால் புட்டியும் கூடவே பெயர்ந்து விடும். இது சுவர்களுக்கு பாதிப்பை ஏற்படுத்தும்.

* இரண்டு முறை புட்டி பூசிவிட்டு, ஒருமுறை பிரைமர் பூசி, பின்னர் இரண்டு முறை எமல்சன் பூசுகின்ற வழக்கம் உள்ளது. அதே வேளையில் பிரைமர் மீதும், எமல்ஷன் மீது புட்டி பூசுவது வீணான செலவைத்தான் ஏற்படுத்தும். புட்டி பூசுவது தவிர்க்க வேண்டும் என்றால் இரண்டு முறை பிரைமர் பூசுவது நல்லது.

* அடர்த்தியான வண்ணங்களைவிட இளவண்ணங்கள் செலவு குறைந்தவையாக இருக்கும். அதே வேளையில் வெள்ளை நிறம் விலை அதிகமாகவே இருக்கும். வீடு மொத்தமும் அடர்த்தியான நிறங்களை பூசுவது அழகல்ல, அதே வேளையில் தேவைப்பட்ட இடங்களில் அடர்த்தியான நிறங்களை பயன்படுத்துவது வீட்டிற்கு மேலும் அழகு சேர்க்கும். இது செலவையும் குறைக்கும்.

* அடர்த்தியான வண்ணங்கள் முதலில் பூசிய வீடுகளில் பின்னர் இள வண்ணங்களை பூசுவது செலவை அதிகரிக்க செய்யும். ஒரு முறைக்கு பல முறை இளவண்ணம் பூசினாலே அடர் வண்ணம் நன்றாக தெரிய தொடங்கும்.

* அதிக விலையுள்ள, நடுத்தர விலையுள்ள, விலை குறைவான என்று மூன்றுவிதமான பெயின்ட்கள் மார்க்கெட்டில் விற்பனை செய்யப்படுகிறது. பெயின்டின் நிறம் மற்றும் அதன் காலாவதி தன்மை ஆகியவற்றை அடிப்படையாக கொண்டு இந்த விலை நிர்ணயம் செய்யப்படுகிறது.

* பிராண்டுகள்தான் தற்போது பிரதானமாக உள்ளது. குறிப்பிட்ட பிராண்டு பெயின்ட்கள் விலை அதிகமாக இருக்கும் போது விலை குறைவான பெயின்ட்களில் சிறந்தவற்றை தேர்வு செய் யலாம். பழைய கட்டிடங்களில் கசிவுகள் இருக்கின்ற தருவாயில் பிராண்டு பெயின்ட் களை தேர்வு செய்வது சிறந்த வழியாக இருக்கும்.

* ஜனதா செம் கிலோ ரூ.10-ரூ.14, சுனோசெம் ரூ.30-ரூ.37, டிஸ்டம்பர் லிட்டர் ரூ.60 - ரூ.80, இன்டீரியர் எமல்ஷன் லிட்டர் ரூ.136-ரூ.310, வெளிபுற எமல்ஷன் ரூ.150- ரூ.350. புட்டி லிட்டருக்கு ரூ.18-ரூ.42. பிரைமர் லிட்டர் ரூ.130-ரூ.210 என்ற விலைகளில் தரத்தை பொறுத்து பெயின்ட்கள் விற்பனை செய்யப்படுகிறது.

நன்றி: தினகரன்

 

பயனுள்ள தகவலுக்கு நன்றி