வண்டலூர் பூங்காவில் வெள்ளை புலி குட்டிகளை நேரில் பார்த்து ரசிக்க ஏற்பாடு

கூடுவாஞ்சேரி: சென்னை அடுத்த வண்டலூரில் அறிஞர் அண்ணா உயிரியல் பூங்கா உள்ளது. இங்குள்ள விலங்குகளையும், பறவைகளையும் காண தினமும் ஏரளமான பார்வையாளர்கள் வந்து செல்கின்றனர். பூங்காவில் வெள்ளை புலி குட்டிகளை பார்வையாளர்கள் கண்டுகளிக்க பூங்கா நிர்வாகத்தினர் ஏற்பாடு செய்துள்ளனர். இது குறித்து பூங்கா செய்தி குறிப்பில் கூறியிருப்பதாவது:அறிஞர் அண்ணா உயிரியல் பூங்காவில் முதல்வரால் பெயர் சூட்டப்பட்ட 5 புலி குட்டிகளை பார்வையாளர்கள் காணும் வகையில் திறந்தவெளி அடைப்பிடங்களில் நேற்று முதல் விடப்பட்டன.

இதில் அனு என்ற வெள்ளை புலி ஈன்றெடுத்த 2 பெண் புலி குட்டிகளுக்கு தாரா மற்றும் மீரா என்றும், ஒரு ஆண் புலி குட்டிக்கு பீமா என்றும் முதல்வர் பெயரிட்டார். மேலும், நம்ருதா என்ற வெள்ளை புலி ஈன்றெடுத்த 2 ஆரஞ்சு நிற ஆண் புலி குட்டிகளுக்கு ஆதித்யா மற்றும் கர்ணா என்றும் பெயர் சூட்டினார். புலி குட்டிகளை நேரடியாக காண வாய்ப்பு இல்லாததால், பிரசவ அறைகளில் சிசிடிவி கேமராக்கள் பொருத்தப்பட்டு, வெளியே கணினி திரையின் மூலம் பார்வையாளர்கள் கண்டுகளிக்க ஏற்பாடு செய்யப்பட்டிருந்தது.

தற்போது புலிக் குட்டிகள் நன்கு வளர்ந்து புதிய சூழலை தாக்குப் பிடிக்கும் நிலையில் உள்ளதால், பிரசவ அறையில் இருந்து திறந்தவெளி அடைப்பிடங்களில் இதர புலிகளுடன் சேர்த்து விடுவதற்கு முடிவு செய்யப்பட்டது. தாய் புலி அனுவுடன் 3 புலி குட்டிகள் “வெள்ளை புலிகள் திறந்த வெளி அடைப்பிடத்திலும்”, தாய் புலி நம்ருதாவுடன் இரண்டு ஆரஞ்சு நிற புலி குட்டிகள் “புலிகள் இனப்பெருக்க மையத்திலும்” பார்வையாளர்கள் காணும் பொருட்டு நேற்று முதல் திறந்து விடப்பட்டன. தற்பொழுது பூங்காவின் வெள்ளைப் புலிகளின் எண்ணிக்கை 14, ஆரஞ்சு நிற புலிகளின் எண்ணிக்கை 9 ஆகவும் உயர்ந்துள்ளது.

நன்றி: தினகரன்

பதிவுக்கு நன்றி அண்ணா.

நேற்று சத்தியமங்கலத்தில் பிடித்த சிறுத்தையை கூட வண்டலூரில் வைத்து இருக்கிறார்கள்.