கனவுகள்! நிகழ்வுகள்!

by முழுமுதலோன் Fri Sep 05, 2014 11:38 am

நல்ல கனவுகளைக் கண்டால் அவை பலிக்காதா என்று ஏங்குகிறோம். கெட்ட கனவுகளைக் கண்டால் அவற்றை மறக்க முயல்கிறோம். சிலர் வாழ்க்கையில் கண்ட கனவுகள் அவர்களை உலகப் புகழடையச் செய்திருக்கிறது!

பிரபல ஆங்கில எழுத்தாளரான ஆர்.எஸ்.ஸ்டீவென்ஸன் எழுதிய பெரும்பாலான நாவல்களுக்கு உட்கருவாகக் கிடைத்த விஷயங்கள் எல்லாம் அவரது கனவுகள்தான். முக்கியமாக அவர் எழுதிய அழியாப் புகழ் பெற்ற நாவலான "டாக்டர் ஜெசில் அண்ட் மிஸ்டர் ஹைட்' என்ற கதைக் கரு உருவானது அவர் கண்ட கனவில்தானாம்.

பிரபல கவிஞரான கோலிரிட்ஜ் என்பவர் கனவில் கண்ட சம்பவங்களை வைத்துதான் கவிதை எழுதுவார். செஸ்டர் டான் என்ற கவிஞர் ஒருநாள் தன் கனவில் வெள்ளைக் குதிரை ஒன்றையும் அதன் சாகசச் செயல்களையும் கண்டாராம். அதன் பலனாக எழுதப்பட்டதுதான் "தி பாலார்ட் ஆஃப் தி வொயிட் ஹார்ஸ்' என்ற பிரபலக் கவிதை.

ஐசக் நியூட்டன் தன் கணிதப் பிரச்னைகளுக்கு ஃபார்முலா கண்டுபிடித்தது பெரும்பாலும் கனவுகள் மூலம்தான்.

சர்க்கரை நோயைக் குணப்படுத்த இன்சுலின் எனும் மருந்தைக் கண்டுபிடித்ததும் கனவின் பலன்தான். ஃப்ரெடரிக் ஜி.பாண்டிங் என்ற அறுவை சிகிச்சை நிபுணர் சர்க்கரை நோயையும், அதற்கான சிகிச்சை முறைகளைப் பற்றியும் சிந்தித்தவாறு படுத்திருந்தார். அப்படியே உறங்கிவிட்ட அவர் கனவில் பிரச்னைக்கு முடிவு கண்டாராம். உடனே விழித்து, கனவில் கண்ட இன்சுலின் தயாரிக்கும் முறையை எழுதிக் கொண்டாராம். அதன் பலன் ஒரு மருந்தின் தோற்றம்.

காந்தி சத்தியாகிரகத்தையே நடத்தும்படி வழிவகுத்துவிட்டது அவர் கண்ட கனவில்தான் என்று அவரே தனது சுயசரிதையில் எழுதியிருக்கிறார்.

By - ஆர்.ஆர்.பூபதி, திண்டுக்கல்
dinamani