செடிகள் செழிப்புடன் வளர வேண்டுமா?

மாற்றம் செய்த நாள்: சனி, செப்டம்பர் 20,2014, 12:51 AM IST பதிவு செய்த நாள்: சனி, செப்டம்பர் 20,2014, 12:51 AM IST
வீட்டில் வளர்க்கப்படும் செடிகள் பராமரிக்கப்படுவதை பொறுத்தே அழகுடன் காட்சி அளிக்கும். ஆதலால் பராமரிப்பில் கூடுதல் கவனம் செலுத்த வேண்டும். அதிலும் காய்கறி செடிகளாக இருந்தால் அவை செழிப்புடன் வளர்வதற்கு ஆவண செய்ய வேண்டும். அப்போதுதான் சமையலுக்கு தேவையான காய்கறிகளை பெற முடியும். அதற்கு போதிய இடைவெளியில் செடிகளுக்கு உரமிட்டு வர வேண்டும். அவை இயற்கை உரங்களாக இருந்தால் ரசாயன கலப்பில்லாத காய்கறிகளை பெறலாம். அது உடல் ஆரோக்கியத்தை மேம்படுத்துவதற்கு உறுதுணையாக இருக்கும். செடிகள் செழிப்புடன் வளர்வதற்கு செய்ய வேண்டிய வழிமுறைகளை பற்றி பார்ப்போம்.

* வீட்டு கழிவுகளையே செடிகளுக்கு உரமாக போடலாம். அவை செடிகளின் வளர்ச்சியில் பங்கெடுக்கும். வீட்டில் குப்பைகள் சேருவதையும் தடுக்கலாம்.

* குறிப்பாக மட்கும் குப்பைகளை உரமாக மாற்றுவதற்கு ஏற்பாடு செய்ய வேண்டும். அவைகளை குழிதோண்டி புதைத்து விட்டால் சில நாட்களுக்கு பிறகு அவை உரமாக மாறி இருக்கும். அதனை மண்தொட்டியில் தூவி வரலாம். அந்த உரக்கலவை செடிகளின் வளர்ச்சிக்கு துணை புரியும்.

* வீட்டில் சமையலுக்கு பயன்படுத்தப்படும் காய்கறிகளை வெட்டும்போது மீதமாகும் கழிவுகளை அப்படியே செடிகளுக்கு உரமாக போடலாம். அந்த தோலில் இருக்கும் சத்துக்களை உரமாக மாற்றி செடிகள் செழித்து வளரும்.

* காபி போடும்போது அடியில் படியும் தூளை செடிகளை சுற்றி போடலாம். அவை சிறந்த பூச்சிக்கொல்லி மருந்தாக செயல்படும் தன்மை கொண்டது. செடிகளை பூச்சிகள் தாக்காமல் பார்த்துக்கொள்ளும். செடிகளும் காபி தூளை உறிஞ்சி நன்றாக வளரும். பாத்திரத்தில் படிந்திருக்கும் காபி தூளை அப்படியே செடிகள் மீது ஊற்றிவிடக்கூடாது. அது சூடாக இல்லாமல் பார்த்துக்கொள்ள வேண்டும். இல்லாவிட்டால் செடிகள் வாடிவிடும்.

* டீ இலைகளை பயன்படுத்தி டீ போடுவதாக இருந்தால் அதன் இலை    களையும் செடிகளுக்கு போடலாம். அதுவும் சிறந்த உரமாக மாறும். எனினும் டீ இலைகள் சூடாக இல்லாமல் பார்த்துக்கொள்ள வேண்டும்.

* அரிசி கழுவும் நீரையும் செடிகளுக்கு ஊற்றலாம். அந்த நீரில் கலந்திருக்கும் சத்துக்களும் செடிகள் செழிப்பாக வளருவதற்கு துணைபுரியும்.

* வேப்பிலையையும் இயற்கை பூச்சிக்கொல்லி மருந்தாக பயன்படுத்தலாம். அதனை நன்றாக அரைத்து செடிகள் மீது தெளித்து வர வேண்டும். அவ்வாறு செய்தால் பூச்சிகள் செடிகளை நெருங்காது. அதனால் செடிகள் பூச்சிகளால் நோய் தாக்குதலுக்கு ஆளாகுவது தவிர்க்கப்படும். செடிகளும் நன்றாக வளரும்.

* வீட்டிலே உரம் தயாரிக்க குழியையோ அல்லது உடைந்த பாத்திரங்களையோ பயன்படுத்தலாம். அதில் சிறிதளவு மண் நிரப்பிக்கொள்ள வேண்டும். அதனுடன் சமையல் அறை கழிவுகளுடன் காய்ந்த இலைகளை சேர்த்து கலக்க வேண்டும். ஏனெனில் பச்சையாக இருக்கும் கழிவுகளுடன் காய்ந்த கழிவுகளை சேர்க்க வேண்டும். அப்போதுதான் விரைவாக மட்க வைக்க முடியும். அதில் கலந்திருக்கும் ஈரப்பதம் மட்கும் தன்மையை உருவாக்கி உரமாக மாற்றுவதற்கு முக்கிய காரணியாக அமையும். இந்த உரக்கலவையை இரண்டு வாரத்துக்கு ஒருமுறை கிளறிவிட வேண்டும். அப்போதுதான் கழிவுகள் மேலும், கீழுமாக இடம் மாறி மட்கும் தன்மையை விரைவாக்கும். இந்த உரத்தில் சத்துக்கள் அதிகமாக கலந்திருக்கும். இவை செடிகளின் வளர்ச்சியை தூண்டுவதற்கும் உதவும்.

நன்றி: தினத்தந்தி

சூப்பர் கட்டுரை அண்ணா

அருமையான பகிர்வு

அறியவேண்டிய தகவல்கள்

பகிர்வுக்கு நன்றி