குதிரை வண்டியில் தபால் டெலிவரி

கோவை அவினாசி ரோடு அண்ணா சிலை அருகே மத்திய தபால் நிலையம் செயல்பட்டு வருகிறது. சென்னை மாகாண கவர்னராக ஆர்தர் லாலி பணியாற்றியபோது இந்த கட்டடம் கட்டப்பட்டது. 1909ம் ஆண்டில் கட்டுமான பணியை துவக்கியதாக கூறப்படுகிறது. கோவை அரசு மருத்துவமனை, கோவை வனக்கல்லூரி கட்டடங்கள் ஒரே காலத்தில் கட்டப்பட்டிருப்பதாக கூறப்படுகிறது. தேக்கு மரத்தில் சுழல் படிக்கட்டு அமைத்து அரண்மனையின் கோட்டை பாணியில் இந்த கட்டடம் கட்டப்பட்டது.

ஆரம்ப காலத்தில் இங்கே தாசப்பர் வாழ்ந்ததாக கூறப்படுகிறது. அப்போது போத்தனூரில் தபால் நிலையம் ஒன்று இயங்கி வந்தது. இட வசதி குறைவினால் தபால் நிலையம் இயங்குவதில் பாதிப்பு ஏற்பட்டது. இந்நிலையில், தாசப்பர் தான் வாழ்ந்த வீட்டை பிரிட்டீஷ் பயன்பாட்டிற்கு குத்தகை அடிப்படையில் வழங்கியதாக தெரிகிறது. போத்தனூர் தபால் நிலையம், ஒசூர் ரோட்டிற்கு மாறியது. அப்போது இந்த தபால் நிலையம் ஜில்லா போஸ்ட் ஆபீஸ் என்ற அந்தஸ்து பெற்றிருந்தது.அப்போது குதிரை வண்டியில் தபால் பட்டுவாடா செய்யப்பட்டது. அந்த காலத்தில் கோவையில் சுமார் 10 அரசு அலுவலகங்கள் மட்டுமே இயங்கி வந்ததாக கூறப்படுகிறது.

தபால்காரர்கள் குதிரை வண்டி மீது அமர்ந்து வீதி, வீதியாக சென்று தபால்களை பட்டுவாடா செய்து வந்தனர்.சுதந்திர காலத்திற்கு பின்னர் மத்திய தபால் அலுவலகம் என்ற அந்தஸ்து பெற்றது. கால போக்கில் குதிரையில் தபால் வினியோகம் நிறுத்தப்பட்டு சைக்கிள் மூலமாக தபால் வினியோகம் செய்யும் பணி மேற்கொள்ளப்பட்டது.நகரின் மத்திய பகுதியில் உள்ள கலெக்டர் அலுவலகம், கோர்ட், பத்திரவு பதிவு அலுவலகம், போலீஸ் கமிஷனர் அலுவலகம், எஸ்.பி அலுவலகம், வருமான வரித்துறை, ரயில்வே, வணிக வரி, வட்டார போக்குவரத்து அலுவலகம் என பெரும்பாலான அரசு அலுவலகங்களும், காந்திபுரம், டவுன்ஹால், உக்கடம், பீளமேடு, சிங்காநல்லூர் உள்ளிட்ட நகரின் மத்திய பகுதிக்கு மத்திய தபால் அலுவலகத்தில் இருந்து தபால் வினியோகம் செய்யப்பட்டு வருகிறது.

- தினகரன்

தகவலுக்கு நன்றி