ராஜ்மா கேசடிலா

[You must be registered and logged in to see this image.]

என்னென்ன தேவை?

ராஜ்மா - 1/2 கப்
வெங்காயம் - 1
தக்காளி - 1
பச்சை மிளகாய் - 2
கொத்தமல்லி - 2 டேபிள்ஸ்பூன்(பொடியாக நறுக்கியது)
துருவிய மொசரெல்லா சீஸ் - 1/2 கப்
எலுமிச்சைச்சாறு - 1 டீஸ்பூன்
மிளகுத் தூள் - 1/4 டீஸ்பூன்
உப்பு - தேவையான அளவு
நெய் - தேவைக்கேற்ப.
டார்டிலா செய்ய...
மைதா - 3/4 கப்
கோதுமை மாவு - 1/4 கப்
எண்ணெய் / வெண்ணெய் - 2 டேபிள்ஸ்பூன்
உப்பு - தேவையான அளவு.
எப்படிச் செய்வது?

ஒரு பாத்திரத்தில் மாவு, தேவையான உப்பு, உருக்கிய வெண்ணெய் ஆகியவற்றைச் சேர்த்து நன்கு கலந்து கொள்ளவும். பிறகு அதில் தேவையான அளவு வெதுவெதுப்பான தண்ணீர் ஊற்றி கெட்டியாக பிசையவும். 15 நிமிடங்கள் வரை மூடி வைக்கவும். பிறகு எடுத்து மீண்டும் வழுவழுப்பாக ஆகும் வரை பிசையவும். ஐந்து - ஒரே அளவு உருண்டைகளாக பிரித்து மெல்லிய சப்பாத்திகளாகத் திரட்டவும்.தோசைக்கல்லை சூடாக்கி, மிதமான தீயில் இரு புறமும் சிவக்காமல் வேக விட்டு எடுக்கவும். இதே போல எல்லாவற்றையும் சுட்டு வைத்துக்கொள்ளவும். ராஜ்மாவை 12 மணிநேரம் ஊற வைத்து, 5 விசில் வரை நன்கு வேக வைத்து, ஒன்றிரண்டாக மசித்துக் கொள்ளவும். உப்பு, மிளகுத் தூள், எலுமிச்சைச்சாறு, கொத்தமல்லித்தழை சேர்த்து கலந்து வைத்துக் கொள்ளவும்.

வெங்காயத்தையும் தக்காளியையும் பொடியாக நறுக்கி வைக்கவும். சுட்டு எடுத்த டார்டிலாவில் ஒரு பாதியில் ராஜ்மாவை முதலில் ஒரு டேபிள் ஸ்பூன் அளவுக்கு பரப்பவும். மேலே வெங்காயம், தக்காளி, சீஸ் தூவவும். மீதி பாதியைக் கொண்டு மூடவும். இதே போல எல்லாவற்றையும் செய்து வைத்துக் கொள்ளவும். தோசைக்கல்லை சூடு செய்து, மிதமான தீயில் நெய் ஊற்றி இரு கேசடிலாவை ஒரே நேரத்தில், படத்தில் காண்பித்துள்ளதை போல இரு பக்கமும் சுட்டு எடுக்கவும். கத்தி அல்லது பீட்ஸா கட்டரைக் கொண்டு முக்கோணமாக வெட்டிப் பரிமாறவும்.

டார்டிலா பெரிதாக இருந்தால்தான் உள்ளே ஸ்டப் செய்ய வசதியாக இருக்கும். டார்டிலாவை முதல் நாளே செய்து ஃபிரிட்ஜில் வைத்துக் கொள்ளலாம். சீஸ் தேவைக்கேற்ப உபயோகிக்கலாம். மிதமான தீயிலே வேகவிட வேண்டும்.கேசடிலாவை தோசைக்கல்லில் பிரட்டும் பொழுது கவனமாக பிரட்டவும்.

- தினகரன்