கனமழை தமிழகத்தின் பல மாவட்டங்களில் சம்பா, குறுவை பயிர்கள் நீரில் மூழ்கியதால் விவசாயிகள் கவலை

தமிழகத்தில் பெய்து வரும் கனமழையால் பல மாவட்டங்களில் லட்சக்கணக்கான ஏக்கர் விளைநிலங்கள் நீரில் மூழ்கியுள்ளது. நாகை மாவட்டம் சீர்காழி, மயிலாடுதுறை, வேதாரண்யம் உள்ளிட்ட பகுதிகளில் பெய்து வரும் கனமழையால் ஒரு லட்சம் ஏக்கர் பரப்பிலான சம்பா பயிர்கள் மற்றும் 3,500 ஏக்கர் பரபரப்பளவில் அறுவடைக்கு தயாராக இருந்த குறுவை பயிர்கள் நீரில் மூழ்கின. வளர்ந்த பயிர்களில் சூல்கட்டும் பருவத்தில் முழங்கால் அளவிற்கு தண்ணீர் உள்ளதால் பயிரில் நெற்கதிர் உருவாகும் வாய்ப்பு இன்றி வீணாகி விடுமோ என்று விவசாயிகள் வேதனை தெரிவித்துள்ளனர்.

திருவண்ணாமலை மாவட்டம் செய்யாறு அருகே வெண்பாக்கம், வாகை, பல்லாவரம் உள்ளி்ட்ட 30-க்கும் மேற்பட்ட ஊர்களில் ஏரிகளின் மதகுகள், கால்வாய்கள், தரைப்பாலங்கள், உடைந்துள்ளது. பெரிய ஏரியில் உடைப்பு ஏற்பட்டு நமண்டி, அரிகரபாக்கம் இடையே தரைப்பாலம் முற்றிலும் உடைந்து சாலை துண்டிக்கப்பட்டுள்ளது. ஏரி மற்றும் கால்வாய்களில் உடைப்பு ஏற்பட்டுள்ளதால் நூற்றுக்கணக்கான விளைநிலங்களில் மழைநீர் புகுந்துள்ளது.

வெள்ளகுள கிராமத்தில் 15 ஆடுகள் வெள்ளத்தில் அடித்துச் செல்லப்பட்டன. கனமழையால் தேனி மாவட்டம் பெரியகுளம் அருகே கும்பகரை அருவியில் நீர் வரத்து அதிகரித்துள்ளது. அருவியில் வெள்ளப்பெருக்கு ஏற்பட்டுள்ளதால் சுற்றுலா பயணிகள் குளிக்க தடைவிதிக்கப்பட்டுள்ளதாக வனச்சரகர் சந்துரு அறிவித்துள்ளார். காளகஸ்தி பகுதியில் பெய்து வரும் கனமழையால் ஏரிகள், குளங்கள், கால்வாய்கள் நிரம்பியுள்ளன.

சொர்ணமுகி ஆற்றில் வெள்ளம் பெருக்கெடுத்து ஓடுவதால் சுற்றுவட்டார பகுதிகளில் இயல்பு வாழ்க்கை பாதிக்கப்பட்டுள்ளது. காளகஸ்தி சிவன் கோவிலில் மழைநீர் புகுந்துள்ளது. இதனால் கோயிலுக்கு வந்த பக்தர்கள் பெரும் சிரமத்திற்கு ஆளாகினர். ஆற்றின் கரையோர பகுதிகளில் தாழ்வான இடங்களில் வசிக்கும் மக்கள் பாதுகாப்பான இடங்களில் தங்க வைக்கப்பட்டுள்ளனர்.

இயற்கையை யாரால் ஜெயிக்க முடியும்!?