எது தேச விரோத செயல்?; சுப்ரீம் கோர்ட் விளக்கம்

by rammalar Wed Sep 07, 2016 12:23 pm

புதுடில்லி: ‘அரசையோ அல்லது அதன் கொள்கையையோ விமர்சித்து பேசுவதை காரணம் காட்டி, ஒருவர் மீது தேச விரோத வழக்கை தொடரக் கூடாது’ என, சுப்ரீம் கோர்ட் கூறியுள்ளது.

தேச விரோத சட்டப் பிரிவு தவறாக பயன்படுத்தப்படுவதை எதிர்த்து, ‘காமன் காஸ்’ என்ற அரசு சாரா அமைப்பு, பொதுநலன் வழக்கை தொடர்ந்துள்ளது. இதை விசாரித்த, நீதிபதிகள் தீபக் மிஸ்ரா, யு.யு.லலித் ஆகியோர் அடங்கிய சுப்ரீம் கோர்ட் அமர்வு, இந்த சட்டப் பிரிவு குறித்து அளித்துள்ள விளக்கத்தில் கூறியுள்ளதாவது: பீஹார் அரசுக்கு எதிரான கேதார்நாத் சிங் வழக்கில், கடந்த, 1962ல் சுப்ரீம் கோர்ட் அரசியலமைப்பு சட்ட அமர்வு அளித்துள்ள தீர்ப்பில், தேச விரோத சட்டத்தை, எப்போது பயன்படுத்த வேண்டும் என்பது, தெளிவாக கூறப்பட்டு உள்ளது.

‘அரசு குறித்தோ, அதன் நடவடிக்கை குறித்தோ விமர்சித்து கருத்து கூறவும், எழுதவும், குடிமக்களுக்கு உரிமை உள்ளது. அதே நேரத்தில், அந்த கருத்தோ, விமர்சனமோ, அரசுக்கு எதிராக மக்களை வன்முறையில் ஈடுபட துாண்டும் விதமாகவோ அல்லது பொது ஒழுங்கை சீர்குலைக்கும் வகையிலோ இருக்கக் கூடாது’ என்று, 1962ல் அளித்த தீர்ப்பில், தெளிவாக கூறப்பட்டு உள்ளது.

அதனால், இந்த சட்டப் பிரிவை மறுபரிசீலனை செய்ய வேண்டிய அவசியமில்லை. அரசையோ அல்லது அதன் கொள்கையையோ விமர்சிப்பதை காரணம் காட்டி, தேச விரோத வழக்கை தொடரக் கூடாது. இவ்வாறு சுப்ரீம் கோர்ட் அமர்வு கூறியுள்ளது.

தினமலர்