‘எனது காலம் முடிந்துவிடவில்லை’- ரேகா அதிரடி

[img][/img]
-

-

இந்தித் திரையுலகில் வயதைக் கடந்தும் புகழுடன்
வாழ்ந்து வருகிறார், நடிகை ரேகா. ஜெமினி கணேசனின்
புதல்வியான அவரிடம் சில கேள்விகள்:

சினிமாவில் நடிக்காமல் எப்படி இத்தனை ஆண்டுகளாக
உங்களால் தாக்குப்பிடிக்க முடிந்தது?

தாக்குப்பிடிப்பது என்ற வார்த்தைக்கு என் அகராதியில்
இடமில்லை. நான் வாழ்க்கையை முழுமையாக
வாழ்கிறேனே தவிர, வெறுமனே தாக்குப்பிடித்துக்
கொண்டிருக்கவில்லை. திரும்பத் திரும்ப வந்த ஒரே
மாதிரியான கதாபாத்திரங்கள் எனக்கு அலுப்பை
ஏற்படுத்தின.

கேமிரா முன் நிற்காமல் இருப்பது எனக்கு வருத்தத்தைத்
தருவது உண்மை. ஆனால் சினிமாவுக்கு வரும் புதிய
திறமையாளர்கள் எனக்குத் தைரியத்தையும், ஊக்கத்தையும்
தருகிறார்கள். அவர்களின் நடிப்பைப் பார்க்க மகிழ்ச்சியாக
இருக்கிறது. மேலும் பொறுமையாக இருக்கவும், எனது
திறமைகளை மேம்படுத்தவும் அவர்கள் நல்ல சவால்
அளிக்கிறார்கள்.

எனது ரசிகர்களின் மாறாத அன்பு, பொறுமை, விசுவாசம்தான்,
எனது காலம் முடிந்துவிடவில்லை என்ற நம்பிக்கையையும்
தெம்பையும் தருகின்றன. சிறந்ததை இனிதான் நான் தர
இருக்கிறேன். அதற்கான கதாபாத்திரங்களை ஏற்க தயாராக
இருக்கிறேன்.

படிக்கும் காலத்தில் நீங்கள் அடக்கமான மாணவியா அல்லது
எதிர்க்குரல் எழுப்புபவரா?

நான் வாழ்க்கையின் மாணவி. இயற்கைதான் எனது ஆசிரியர்.
நான் எங்கம்மாவுக்கு பணிவான குழந்தையாக இருந்திருக்கிறேன்.
அவரது செயல்களை எதிர்த்து நான் கேள்வி கேட்டதேயில்லை.
நான் அமைதியான ஆனால் ஆழமான பெண். நான் அமைதியாக
இருக்கும்போதுதான் ரொம்ப வலுவாக இருப்பேன்.

என்னைச் சுற்றி நடக்கும் விஷயங்களை அமைதியாக கவனித்துக்
கொண்டிருப்பேன். அதேபோல, ஞாபக விஷயத்தில் நான் யானை
மாதிரி. நான் மறக்க நினைக்கும் விஷயங்களைக் கூட என்னால்
மறக்க முடிவதில்லை. சுற்றி நடப்பவற்றை என் மனம் துல்லியமாகப்
புரிந்துகொள்ளும் என்றாலும், வாய் திறந்து நான் கேள்வி
கேட்பதில்லை.

யாரையும், எதையும் நான் திருப்பித் தாக்குவதில்லை.
வன்முறையில் எனக்கு நம்பிக்கையில்லை. எந்த எதிர்மறையான
விஷயமும் என்னிடம் இல்லை. எப்போதும் வாழ்வின் நல்ல
பக்கங்களை மட்டும் பார்க்கலாம் என்பது எனது எண்ணம்.

கோபமும் கூட ஒரு மதிப்புமிக்க, வலுவான உணர்வுதான் என்ற
போதும் அதையும் சரியான திசையில் செலுத்துவதுதான் சரி
என்று நான் கருதுகிறேன்.

பிறந்தநாள் கொண்டாடுவதில் உங்களுக்கு விருப்பம் உண்டா?
வழக்கமாக எப்படி பிறந்தநாளைக் கொண்டாடுவீர்கள்?

இதுபோன்ற சம்பிரதாயங்களில் எனக்கு விருப்பம் இல்லை.
அதைவிட, வாழ்வின் சிறந்த அம்சங்களைக் கொண்டாடத்தான்
நான் விரும்புகிறேன். நான் எனது வாழ்வின் ஒவ்வொரு
கணத்தையும் வாழ்வின் கடைசிக் கணமாக எண்ணி வாழ்கிறேன்.

என்னைப் பொறுத்தவரை ஒவ்வொரு நாளும் கொண்டாட்டமே.
அதை நான் நன்றி உணர்வோடு கொண்டாடுகிறேன்.
நான் ஒவ்வொரு நாளும் புதிதாய் பிறக்கிறேன். எனது பெற்றோர்,
எனது குடும்பத்தினர், எனது ரசிகர்கள், நலம்விரும்பிகள்
என் மீது பொழியும் ஆசீர்வாதங்களை மதிக்கிறேன்.
-
--------------------------------------------
தினத்தந்தி