நாளை முதல் தமிழகத்தில் கன மழைக்கு வாய்ப்பு: மீனவர்கள் உடனே கரை திரும்ப எச்சரிக்கை

தமிழகத்தில் வியாழக்கிழமை (டிச.1) முதல் கனமழை
பெய்ய வாய்ப்புள்ளது என்று சென்னை வானிலை ஆய்வு
மைய இயக்குநர் பாலச்சந்திரன் கூறினார்.

கடல் பகுதியில் வேகமான காற்று வீசக்கூடும் என்பதால்
மீனவர்கள் உடனே கரைக்குத் திரும்ப எச்சரிக்கை
விடுக்கப்பட்டுள்ளது.

தென்கிழக்கு வங்க கடலில் உருவாகியுள்ள காற்றழுத்தத்
தாழ்வுப் பகுதியானது வலுப்பெற்று காற்றழுத்தத் தாழ்வு
மண்டலாக மாறும் சூழல் உள்ளது.

இந்தக் காற்றழுத்தத் தாழ்வு மண்டலமானது தென்மேற்கு
திசையை நோக்கி நகரும்போது தமிழகத்தில் மழை
பெய்யக்கூடும் என்று எதிர்பார்க்கப்படுகிறது.

இதுதொடர்பாக பாலச்சந்திரன், சென்னையில்
செய்தியாளர்களிடம் செவ்வாய்க்கிழமை கூறியது:

தென்கிழக்கு வங்கக் கடல் பகுதியில் உருவாகியுள்ள
காற்றழுத்தத் தாழ்வுப் பகுதியானது வலுப்பெற்று அதே
இடத்தில் நீடிக்கிறது. இந்த காற்றழுத்தத் தாழ்வு
நிலையானது மேலும் வலுவடைந்து காற்றழுத்தத் தாழ்வு
மண்டலமாக மாறக்கூடும்.

காற்றழுத்தத் தாழ்வு மண்டலமானது வடதமிழகம், ப
புதுவையை நோக்கி நகரக்கூடும். இதன் காரணமாக
வியாழக்கிழமை முதல் தமிழகம், புதுவையில் அநேக
இடங்களில் மழை பெய்யக்கூடும். ஒரு சில இடங்களில்
கனமழை பெய்யக்கூடும்.

மீனவர்கள் கரை திரும்ப எச்சரிக்கை:
காற்றழுத்தத் தாழ்வு மண்டலத்தின் காரணமாக தமிழகம்,
புதுவை கடற்பகுதியில் மணிக்கு 45 முதல் 55 கி.மீ. வேகத்தில்
பலத்த காற்று வீசக்கூடும்.

எனவே, புதன்கிழமை (நவ.30) மாலை முதல் மீனவர்கள்
யாரும் கடலுக்குள் மீன்பிடிக்கச் செல்ல வேண்டாம்.
ஆழ்கடலில் மீன்பிடித்துக் கொண்டிருக்கும் மீனவர்கள்
உடனே கரைக்குத் திரும்ப எச்சரிக்கப்படுகிறார்கள்
என்றார் அவர்.

10 செ.மீ மழை:
வங்கக் கடலில் உருவான "கியாந்த்' புயலின் காரணமாக
வடகிழக்கு பருவமழையில் தாமதம் ஏற்பட்டுள்ளது.
தமிழகத்தில் அக்டோபர் 1 -ஆம் தேதி முதல் இதுவரை,
இயல்பைவிட 70 சதவீதம் மழை குறைவாகப் பெய்துள்ளது.

தமிழகத்தின் சராசரி ஆண்டு மழை அளவு 32 செ.மீ. ஆகும்.
ஆனால் இந்த ஆண்டு 10 செ.மீ. மழை தான் பெய்துள்ளது.

பனிப்பொழிவு நீடிக்கும்:
வடமாநிலங்களில் குளிர்காலம் தொடங்கியுள்ள நிலையில்,
அங்குள்ள குளிர் காற்று தெற்கு நோக்கி நகர்ந்துள்ளதால்,
தமிழகத்தில் குளிர்காற்று வீசக்கூடும். இரவு நேரங்களில்
பனிப்பொழிவும் காணப்படும். இதனால் பகலில் வெயிலின்
தாக்கம் குறைந்து காணப்படும் என்று சென்னை வானிலை
ஆய்வு மையம் தெரிவித்துள்ளது.
-
----------------------------------------
தினமணி