மருத்துவ பட்ட மேற்படிப்புகளுக்கான கலந்தாய்வு இன்று தொடங்குகிறது

-
சென்னை :
எம்டி, எம்எஸ், எம்டிஎஸ் ஆகிய மருத்துவ பட்ட
மேற்படிப்புகளுக்கான கலந்தாய்வு சென்னையில் இன்று
தொடங்குகிறது.

தமிழகத்தில் அரசு மருத்துவக் கல்லூரிகளில் முதுநிலை
மருத்துவப் படிப்பில் அரசு மருத்துவர்களுக்கு 50 விழுக்காடு
இட ஒதுக்கீடு வழங்க முடியாது. மாணவர் சேர்க்கையை
இந்திய மருத்துவ கவுன்சில் விதிகளைப் பின்பற்றி நடத்த
வேண்டும் என்று உயர் நீதிமன்றம் சனிக்கிழமை
உத்தரவிட்டது.

இந்நிலையில் நீட் தேர்வு மதிப்பெண்கள் அடிப்படையில்
மருத்துவ பட்ட மேற்படிப்புக்கான தரவரிசைப் பட்டியலை
மருத்துவக் கல்வி இயக்கம் வெளியிட்டது.

4974 மாணவர்கள் இந்த பட்டியலில் இடம்பெற்றுள்ளனர்.
பல் மருத்துவப் பட்டமேற்படிப்பான எம்டிஎஸ் தரவரிசைப்
பட்டியலில் 627 பேர் இடம் பெற்றுள்ளனர்.

இதற்கான நீட் தேர்வு கடந்த ஆண்டு டிசம்பர் மாதம்
நடைபெற்றது.

தற்போது மருத்துவப் பட்ட படிப்புகளுக்கான கலந்தாய்வு,
சென்னை அண்ணாசாலையில் உள்ள அரசு பன்னோக்கு
உயர் சிறப்பு மருத்துவமனையில் இன்று நண்பகல் 12 மணிக்கு
தொடங்குகிறது. இன்று மாற்றுத்திறனாளிகளுக்கான
கலந்தாய்வு நடைபெறுகிறது.


நாளை முதல் 11-ம் தேதி வரை பொதுப் பிரிவினருக்கான
கலந்தாய்வு நடக்கிறது. 11-ம் தேதி பிற்பகலில் பல் மருத்துவப்
பட்ட மேற்படிப்புகளுக்கான கலந்தாய்வு நடைபெற உள்ளது
என்று மருத்துவக் கல்வி இயக்ககம் தெரிவித்துள்ளது.

நீதிமன்றத்தில் வழக்கு இருந்ததால் தமிழகத்தில் திட்டமிட்டபடி
கலந்தாய்வு தொடங்கவில்லை என்பது குறிப்பிடத்தக்கது.
-
--------------------------
தினபூமி