போலி டாக்டர்களை பிடிக்க அரசு அதிரடி வேட்டை : தமிழகம் முழுவதும் ஒரேநாளில் பலர் கைது

சென்னை : தமிழகம் முழுவதும் போலி டாக்டர்களை பிடிக்க, அரசு அதிரடி நடவடிக்கை எடுத்துள்ளது. மருத்துவத்துறை அதிகாரிகளும், போலீசாரும் சேர்ந்து நேற்று ஒரே நாளில் நடத்திய அதிரடி வேட்டையில், 50க்கும் மேற்பட்ட போலி டாக்டர்கள் கைது செய்யப்பட்டனர்.

பொதுமக்களின் உயிரை பாதுகாக்கும் மருத்துவப் பணியில் அலோபதி, ஓமியோபதி, சித்தா, யுனானி, ஆயுர்வேதம் உள்ளிட்ட மருத்துவ முறைகள் உள்ளன. இவற்றிற்கான படிப்புகளை முடித்து டாக்டர்கள், மருத்துவப் பணிகளை மேற்கொண்டு வருகின்றனர். இந்த மருத்துவப் படிப்புகளை படித்ததாக போலியான சான்றிதழ்கள் பெற்றும், முறையாக மருத்துவப் படிப்புகளை படிக்காமலும், மருத்துவமனைகளில் பணியாற்றிய அனுபவத்தைக் கொண்டும் மாநிலம் முழுவதும் ஏராளமானோர் கிளினிக்குகளை ஆரம்பித்து மருத்துவம் பார்த்து வருகின்றனர். இவ்வாறான போலி டாக்டர்களை அடையாளம் கண்டு, அவர்கள் மீது நடவடிக்கை எடுக்க வேண்டும் என, இந்திய மருத்துவ சங்கம் கோரிக்கை விடுத்ததுடன், தமிழகம் முழுவதும் 2,000த்திற்கும் மேற்பட்ட போலி டாக்டர்கள் அடங்கிய பட்டியலையும் தயாரித்தது. இந்தபட்டியல் டி.ஜி.பி., லத்திகா சரண், கூடுதல் டி.ஜி.பி., ராதாகிருஷ்ணன் ஆகியோரிடம் அளிக்கப்பட்டது.

இதனடிப்படையில், மாநிலம் முழுவதும் ஒரே நேரத்தில் அதிரடி ஆய்வு மேற்கொண்டு, போலி டாக்டர்கள் மீது நடவடிக்கை எடுக்குமாறு, அனைத்து மாவட்ட எஸ்.பி.,க்கள் மற்றும் நகர கமிஷனர்களுக்கு உத்தரவு பிறப்பிக்கப் பட்டது. அதன்படி, நேற்று முன்தினம் இரவு முதல், தமிழகம் முழுவதும் சோதனை நடவடிக்கையில் போலீசார் இறங்கினர். ஒரே நாளில் நடத்தப்பட்ட வேட்டையில் 50க்கும் மேற்பட்டோர் கைது செய்யப்பட்டனர். சிக்கியுள்ள அனைவரும் பெரும்பாலும் எட்டாம் வகுப்பு முதல் பிளஸ் 2 வரை படித்தவர்கள். பெண்களில் பலர், நர்சாக பணிபுரிந்தவர்கள் என்பது குறிப்பிடத்தக்கது. இவர்கள் அனைவரும், பல ஆண்டுகளாக ஆர்.எம்.பி., என விளம்பரம் செய்து, அலோபதி மருந்துகளை பொதுமக்களுக்கு வழங்கியுள்ளது தெரியவந்துள்ளது. இது குறித்து, சட்டம் ஒழுங்கு ஏ.டி.ஜி.பி., ராதாகிருஷ்ணன் கூறும் போது,"தகுதியான பட்டம் மற்றும் மருத்துவ அறிவு இல்லாமல் மருத்துவப் பணியில் ஈடுபடுபவர்கள் மீது கடுமையான நடவடிக்கை தொடரும்' என்றார்.

இதெல்லாம் எப்போவோ செய்திருக்கணும் tolate இதுல என்ன அதிரடி இருக்கு எல்லாம் சாதாரணம் தான் , இப்பவாவது தோனுச்சே