எமன் வந்தான்!

by nilavu Wed Jan 16, 2013 2:13 am

வணக்கம்

எமன் வந்தான்!

நிசப்தத்தை நிர்மூலமாக்கிய
நீ. . .ண்ட தீனக் குரல்.

நள்ளிரவை நாராசமாக்கிய
நடுத்தெரு நாயொன்றின்
அபஸ்வர அழுகை ஒலி.

‘’உணவு போதாததால்
ஓலமிடுகிறதோ…’’
உறக்கத்தைக் கலைத்த
உக்கிரத்தில்
உதிர்த்து வைத்தாள் இல்லத்தரசி.

‘’நமனின் வருகையை
நாய்கள் மட்டுமே நன்குணரும்,
சாவு ஒன்று நம் தெருவுக்கு
சடுதியில் வரப் போகிறது,..

‘’இழுத்துக் கொண்டிருக்கும்
எதிர் வீட்டுக் கிழவியின்
பழுத்த உயிருக்குப்
பாசக் கயிறு வந்து விட்டது’’
அனுபவத்தை அர்த்தப் படுத்தினார்
அரைகுறை தூக்கத்தில் அப்பா.

விடிந்ததும் எழுந்தேன்,
வீதியில் கூட்டம்,
விதி முடிந்திருந்தது.
எதிர்பார்த்தது போலவே
எமன் வந்து எடுத்துச் சென்றிருக்கிறான்

ஆம்,
ஊர்தி ஒன்றில் சிக்கி
உயிரை விட்டிருந்தது
ஊளையிட்டுக் கொண்டிருந்த
நொண்டி நாய்!

நன்றி