முதல் பெண் பிரதமரானார் கில்லர்ட்

முதல் பெண் பிரதமரானார் கில்லர்ட்

Fri, 25/06/2010
ஆஸ்திரேலியாவின் தொழிற்கட்சியில் நேற்று நிகழ்ந்த தலைமைத்துவப் போராட்டத்தில் துணைத் தலைவரான ஜுலியா கில்லர்ட் தலைவர் பதவியைக் கைப்பற்றி அந்நாட்டின் புதிய பெண் பிரதமராகியுள்ளார்.
இவர் நேற்று வரை பிரதமராக இருந்த கெவின் ரட் அமைச்சரைவையில் வேலையிட உறவுகள், கல்வி ஆகிய துறை களுக்கு அமைச்சராக பொறுப்பேற்றிருந்தார்.
கெவின் ரட்டைக் காட்டிலும் மற்றவர் களுடன் இயல்பாகப் பழகுவதில் வல்லவர், கொடுத்த பொறுப்பு களைத் திறம்பட நிர்வகிக்கக்கூடியவர், நாடாளுமன்றத்தில் உறுதியுடனும், தன்னம்பிக்கையுடனும் செயலாற்றக்கூடியவர் என்றும் இவரை அரசியல் பார்வையாளர்கள் வர்ணிக்கின்றனர்.
இத்தகைய குணாதிசயங்களைக் கொண்டு இவர் தமது தொழிற்கட்சி சகாக்களின் நம்பிக்கையைப் பெற்று கெவின் ரட்டைத் தலைமைப் பதவியில் இருந்து கீழிறக்கிவிட்டார் என்றும் கூறப்படுகிறது.
இதற்கிடையே, ஜுலியா கில்லர்ட், “நல்லதோர் அரசாங்கம் வழி தெரியாமல் தடுமாறியதால்” தலைமைத்துவத்திற்குப் போட்டியிட்டதாக வியாழக்கிழமை கூறினார்.
அதோடு, எதிர்வரும் மாதங்களில் தேர்தல் நடத்தவும் உறுதிமொழி அளித்தார்.
கட்சி வாக்கெடுப்பில் கெவின் ரட்டை வீழ்த்திய திருவாட்டி கில்லர்ட், கைவிடப்பட்ட கரிம வணிகத் திட்டத்தை மீண்டும் உயிர்ப்பிக்கப் போவதாகவும் உறுதி கூறினார்.
புதிய வளப்பொருள் வரிக்கு எதிராக இயக்கம் நடத்துவதை நிறுத்து மாறு நிலச்சுரங்கத் தொழில்துறையிடமும் அவர் வலியுறுத்தினார். திரு ரட் தோல்வியடைந் ததற்கு இவ்விரண்டுமே முக்கிய காரணங்களாகும்.
“நல்லதோர் அரசாங்கம் வழிதவறிச் செல்வதால் அடுத்த தேர்தலில் ஆதரவு கிட்டாமல் போகக்கூடும் என்பதால், கட்சித் தலைமைத்துவத்தை மாற்றுமாறு என் சகாக்களிடம் கேட்டுக் கொண்டேன்” என்றார் திருவாட்டி கில்லர்ட்.
“நடப்பதையெல்லாம் சும்மா பார்த்துக் கொண்டிருக்க நான் விரும்பவில்லை.
மிகுந்த பணிவு, உறுதி, ஆர்வம் ஆகியவற்றுடன் என் சகாக்களின் ஆதரவை நாடினேன்” என்று முறையாகப் பதவிப் பிரமாணம் எடுப்பதற்குமுன் அவர் சொன்னார்.
ஆஸ்திரேலிய மக்கள் அவரைப் பிரதமராகத் தேர்ந்தெடுக்கவில்லை என்பதால், எதிர்வரும் மாதங்களில் பொதுத் தேர்தல் நடத்துமாறு தலைமை ஆளுநரிடம் கேட்டுக் கொள்ளப் போவதாகத் திருவாட்டி கில்லர்ட் தெரிவித்தார்.