பேருந்தில் சுற்றுலா செல்வது வசதியானதா

by மகா பிரபு Tue Mar 05, 2013 8:27 pm

[You must be registered and logged in to see this image.]

பொதுவாக பேருந்தில் சுற்றுலா செல்வது என்பது சற்று வசதியானது என்பது அனைவருக்கும் தெரிந்த விஷயம்தான். ஏன் என்றால், நாம் செல்லும் இடத்துக்கு மிக அருகில் பேருந்துகள் செல்லும் என்பதால், பெரும்பாலான சுற்றுலாப் பயணிகள் பேருந்துகளை விரும்புவார்கள்.

ஒரு நகரத்தில் உள்ள பல்வேறு சுற்றுலாத் தலங்களை அடுத்தடுத்துப் பார்க்க பேருந்துகள் வசதியாக அமையும். அதில் நமக்கு ஏற்ற வகையில் நேரத்தை ஒதுக்கி சுற்றுலாத் தலங்களைக் காண முடியும்.

மேலும், ஓரிடத்தில் இருந்து மற்றொரு இடத்துக்குச் செல்ல பேருந்துகள் எளிதகாவும் இருக்கும். சில நகரங்களுக்கு ரயில்களை விட பேருந்துகள் அதிக எண்ணிக்கையில் இயக்கப்படுவதும் இதற்குக் காரணம்.

ஏதேனும் அசௌகரியங்கள் ஏற்பட்டால், அடுத்து நிற்கும் பேருந்து நிறுத்தத்தில் இறங்கி நமக்குத் தேவையானதை பேருந்து பயணத்தில் மட்டும் தான் பெற்றுக் கொள்ள முடியும்.

பேருந்து பயணமாக இருந்தால், முன்கூட்டியே திட்டமிட வேண்டிய அவசியம் இல்லை. முன்பதிவோ, டிக்கெட் கிடைக்கவில்லை என்ற சிக்கலோ இருக்காது. திடீரென சுற்றுலா கிளம்புபவர்களுக்கு பேருந்து போக்குவரத்து சரியானதாக இருக்கும்.

நாம் எங்கு இறங்கப் போகிறோமோ, அங்கு நாம் இறங்கும் நேரம் என்னவாக இருக்கும், அங்கு இறங்கியதும், அருகில் விடுதிகள் உள்ளனவா, சாப்பிட வசதி இருக்கிறதா என்பதை முன்கூட்டியே அறிந்து கொண்டால், இறங்கிய பிறகு இங்கு ஏன் இறங்கினோம் என்று வருத்தப்பட வாய்ப்பிருக்காது.

சில இடங்களில் சுற்றுலாப் பயணிகளுக்கு பேருந்துகளில் சிறப்பு கட்டணச் சலுகை வழங்கப்படுகிறது. ஒரு குறிப்பிட்ட தொகைக்கு டிக்கெட்டை எடுத்து விட்டால் அன்றைய நாள் முழுவதும் எந்த பேருந்திலும் ஏறலாம், இறங்கலாம் என்ற சலுகைகள் பயணிகளுக்கு வசதியாக இருக்கும்.

நாம் செல்லும் இடத்துக்கு சிறப்பு சுற்றுலாப் பேருந்துகள் ஏதேனும் செல்கின்றதா என்பதை கேட்டறிந்து, அந்த பேருந்தின் மூலம் சுற்றுலா செல்வது வீண் அலைச்சலைக் குறைக்கும்.

வெகு தூரம் செல்லும் பேருந்துகள் வழியில், சாப்பிட ஹோட்டல்களில் நிறுத்துவது உண்டு. இதனால் உணவினை தூக்கிச் செல்ல வேண்டிய அவசியம் இருக்காது.

ஆனால் பேருந்து பயணத்தில் சில சிரமங்களும் உள்ளன...

பல வழித்தடங்களில் சாலைகள் மோசமாக இருப்பதால் உடல்நிலை பாதிக்கப்பட்டவர்கள், கர்ப்பிணிகள் போன்றவர்களுக்கு பேருந்து போக்குவரத்து சரியாக வராது.

பேருந்தில் பாதுகாப்பு வசதி என்பது முற்றிலும் ஸீரோவாக இருக்கும். நமது உடைமைகளை நாம் தான் பத்திரமாக பார்த்துக் கொள்ள வேண்டும்.

பொதுவாக இரவு நேரங்களில் பேருந்து பயணத்தைத் தவிர்ப்பது பாதுகாப்பானது.

குழந்தைகளோடு பயணிப்பதாக இருந்தால் பேருந்து பயணம் சரிவராது. ஏன் என்றால், பேருந்தில் கழிவறை வசதிகள் இல்லை.

சிலருக்கு பேருந்தில் பயணித்தால் வாந்தி, மயக்கம் போன்றவை ஏற்படும். அவர்கள் பேருந்து பயணத்தை தவிர்க்க வேண்டும்.

இரவு நேரத்திலோ அல்லது வெகு நேரமோ பேருந்தில் பயணித்தால், தூங்குவதற்கு வசதி இருக்காது. இதனால், காலையில் சுற்றிப் பார்க்கும் இடத்துக்கு உற்சாகமாகப் போக இயலாமல் போகலாம்.

எதையும் நன்கு திட்டமிட்டு, சரியாக முடிவெடுத்து சுற்றுலா கிளம்பினால் வீண் பிரச்னைகளை தவிர்க்கலாம்.

தினமணி