கர்நாடகாவில் ரெட்டி சகோதரர்களால் பாரதீய ஜனதா பிளவுபடும் ஆபத்து

by Guest Sun Jul 18, 2010 9:32 am

கர்நாடகாவில் ரெட்டி சகோதரர்களால் பாரதீய ஜனதா பிளவுபடும் ஆபத்து

கர்நாடகத்தில் ரெட்டி சகோதரர்கள் என்று அழைக்கப்படும் ஜனார்த்தன ரெட்டி, கருணாகர ரெட்டி ஆகியோர் எடியூரப்பா மந்திரி சபையில் மந்திரிகளாக பொறுப்பு வகித்து வருகிறார்கள்.

ரெட்டி சகோதரர்களுக்கு சொந்தமான சுரங்க தொழில் மற்றும் இரும்பு தாது ஏற்றுமதி நிறுவனம் செயல்படுகிறது. இங்கு சட்ட விரோதமாக இரும்பு தாது ஏற்றுமதி செய்வதாக எதிர்க்கட்சிகள் புகார் கூறியுள்ளன.

இது குறித்து சி.பி.ஐ. விசாரணை நடத்தக்கோரி காங்கிரஸ், ஐக்கிய ஜனதா தளம் எம்.எல்.ஏ.க்கள் சட்டசபையில் உள்ளிருப்பு போராட்டம் நடத்தி வருகிறார்கள். இன்று 5-வது நாளாக போராட்டம் நீடித்தது. சி.பி.ஐ. விசாரணைக்கு உத்தரவிடும் வரை போராட்டம் நடக்கும், சட்ட சபையை நடத்த விட மாட்டோம் என்று எதிர்க்கட்சித்தலைவர் சித்தராமையா கூறி உள்ளார்.

இந்த பிரச்சினையில் கவர்னர் பரத்வாஜ் நடவடிக்கையில் இறங்கியுள்ளார். ரெட்டி சகோதரர்களின் சட்டவிரோத சுரங்க தொழில் குறித்து மத்திய அரசுக்கும், ஜனாதிபதிக்கும் அறிக்கை அனுப்பி உள்ளார். இத னால் கர்நாடக பாரதீய ஜனதா அரசுக்கு நெருக்கடி ஏற்பட்டு உள்ளது. கடந்த 5 நாட்களாக கர்நாடக சட்டசபை நடைபெறாமல் முடங்கிகிடக்கிறது.

இதற்கிடையே ரெட்டி சகோதரர்களால் கர்நாடக பாரதீய ஜனாவில் பிளவு ஏற்படும் ஆபத்து உருவாகி உள்ளது. ரெட்டி சகோ தரர்கள் நடத்தும் தனிப்பட்ட தொழில் காரணமாக கட்சிக்கு கெட்ட பெயர் ஏற்படுவதாக பாரதீய ஜனதா தலைவர்கள் கருதுகிறார்கள்.

பாரதீய ஜனதாவில் உள்ள ரெட்டி சகோதரர்ககளின் எதிர்பாளர்கள் இந்த பிரச் சினையை தூண்டி விடுவ தாகவும் குற்றச்சாட்டு எழுந்துள்ளது. இதனால் பிரச்சினைக்கு முற்றுப் புள்ளி வைக்க வேண்டும் இல்லையெனில் அது பாரதீய ஜனதா அரசுக்கு ஆபத்தாக முடியும் என்று கருத்து உருவாகியுள்ளது.

ஏற்கனவே ரெட்டி சகோத ரர்களுக்கும், முதல்- மந்திரி எடியூரப்பாவுக்கும் இடையே பிரச்சினை ஏற்பட்டது. ரெட்டி சகோதரர்களின் ஆதரவாளர்கள் எடியூரப்பாவுக்கு எதிராக போர்க்கொடி உயர்த்தினார்கள்.

கடைசியில் மேலிடம் இதில்தலையிட்டு சமர சம் ஏற்படுத்தியது. இதை மனதில் வைத்து முதல்- மந்திரி எடியூரப்பா காய் நகர்த் துவதாகவும், குற்றச்சாட்டு எழுந்துள்ளது.

இந்த பிரச்சினையில் சி.பி.ஐ. விசாரணைக்கு உத்தர விட்டால் ரெட்டி சகோதரர்களின் எதிர்ப்புக்கு ஆளாக நேரிடும் அதேசமயம் எதிர்க் கட்சிகளின் போராட்டம் நீடித்தால் ஆட்சிக்கு நெருக்கடி ஏற்படும் என்ற நிலையில் எடியூரப்பா உள்ளார்.

இந்த நிலையில் பெங்களூரில் இன்று கர்நாடக கவர்னர் பரத்வாஜை முதல்-மந்திரி எடியூரப்பா சந்தித்துப் பேசினார். எதிர்க்கட்சி எம்.எல்.ஏ.க்களின் உள்ளிருப்பு போராட்டம் குறித்து அவர் கவர்னருடன் முக்கிய ஆலோசனை நடத்தினார்.

இன்று மாலை எடியூரப்பா டெல்லி செல்கிறார். நாளை அல்லது நாளை மறுநாள் அவர் பிரதமர் மன்மோகன்சிங்கை சந்திப்பார் என்று கூறப்படுகிறது. பிரதமரை சந்திக்கும் முன் அவர் கவர்னருடன் ஆலோசனை நடத்தியதாக தெரிகிறது.

மேலும் டெல்லியில் ரெட்டி சகோதரர்கள் பிரச்சினை பற்றி பாரதீயஜனதா தலைவர்களையும் எடியூரப்பா சந்தித்து பேசுகிறார்